16 წლის ახალგაზრდა, რომელიც საზოგადოებრივი მაუწყებლიდანა წამოსულ მსვლელობას აედევნა და შემდეგ ბესიკის ქუჩაზე "იარაღის დემონსტრირება" მოახდინა, დააკავეს. ამის შესახებ ინფორმაციას შსს ავრცელებს. უწყების ცნობით, დადასტურების შემთხვევაში დანაშაული 7 წლით თავისუფლების აღკვეთას ითვალისწინებს.

"შინაგან საქმეთა სამინისტროს საპატრულო პოლიციის თანამშრომლებმა ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების ბრალდებით 2009 წელს დაბადებული დ.გ. დააკავეს.

გამოძიებით დგინდება, რომ 2025 წლის 15 სექტემბერს, საზოგადოებრივი მაუწყებლის შენობის მიმდებარე ტერიტორიიდან მსვლელობით წამოსული ოცდაათამდე აქტივისტი რუსთაველისა და ბესიკის ქუჩის კვეთაზე სიტყვიერად დაუპირისპირდა რამდენიმე მოქალაქეს, საიდანაც ერთ-ერთმა მოახდინა პისტოლეტის დემონსტრირება, რის გამოც აქციის ორი მონაწილე გაეკიდა მას. აღნიშნული პირი შევიდა ბესიკის ქუჩის მიმდებარედ არსებულ კაფეში, სადაც აქტივისტებმა შებოჭეს და წაართვეს იარაღი, რომელიც პირველადი დათვალიერებით, სავარაუდოდ, არის პნევმატიკური პისტოლეტი.

ხსენებული პირი და წართმეული იარაღი აქტივისტებმა გადასცეს საპატრულო პოლიციის თანამშრომლებს.

დადასტურების შემთხვევაში დანაშაული 7 წლით თავისუფლების აღკვეთას ითვალისწინებს", — წერია გავრცელებულ ინფორმაციაში.

აქტივისტების ცნობით, საზოგადოებრივი მაუწყებლის მარშის მსვლელობას 4 ახალგაზრდა აედევნა, შეურაცხყოფას აყენებდნენ, შემდეგ კი ერთ-ერთმა იარაღი ამოიღო. აქტივისტმა, ლევან ჯობავამ მას იარაღი წაართვა, შემდეგ ადგილზე საპატრულო პოლიცია გამოიძახეს, რის შემდეგაც შსს-ს თანამშრომლებმა 16 წლის ახალგაზრდა დააკავეს.