საფრანგეთში მასშტაბურმა საპროტესტო აქციებმა ტრანსპორტის მოძრაობის შეზღუდვა, ნაგვის ურნების დაწვა და ზოგიერთ ადგილას პოლიციასთან დაპირისპირება გამოიწვია. დემონსტრანტებმა "ყველაფერი დაბლოკეთ" კამპანიით პრეზიდენტ ემანუელ მაკრონის, პოლიტიკური ელიტისა და ბიუჯეტში დაგეგმილი შეკვეცების წინააღმდეგ აღშფოთება გამოხატეს. ამის შესახებ ინფორმაციას Reuters ავრცელებს.

ქვეყნის მასშტაბით თითქმის 300 დემონსტრანტი დააკავეს.

პარიზში პოლიციამ სკოლის შესასვლელთან შეკრებილი ახალგაზრდების წინააღმდეგ ცრემლსადენი გაზი გამოიყენა, მეხანძრეებმა კი ადგილიდან ბარიკადისგან დარჩენილი დამწვარი ნივთები მოაშორეს. პოლიციის ცნობით, მათ შეაჩერეს დაახლოებით 1000-კაციანი ჯგუფი, რომელიც Gare du Nord-ის სადგურში შეჭრას ცდილობდა.

რენში დემონსტრანტებმა ავტობუსი დაწვეს. ამის შესახებ შინაგან საქმეთა მინისტრმა ბრიუნო რეტაიომ განაცხადა. მისივე თქმით, ზოგიერთმა დემონსტრანტმა პოლიციას ქვებით შეუტია. მინისტრმა ასევე აღნიშნა, რომ დღის მეორე ნახევარში დაგეგმილ აქციებში შეიძლება რადიკალურმა მემარცხენე ჯგუფებმა შეაღწიონ და ძალადობას ჰქონდეს ადგილი.

პროტესტი ბიუჯეტის შემცირების გეგმებმა გამოიწვია, რომელიც ყოფილი პრემიერმინისტრის, ფრანსუა ბაირუს ინიციატივით შემუშავდა, რასაც შედეგად ნდობის ვოტუმის გამოცხადება და მისი ხელისუფლებიდან ჩამოშორება მოჰყვა. დემონსტრანტები საჯარო სერვისებისთვის მეტ დაფინანსებას და ზოგ შემთხვევაში, მაკრონის გადადგომასაც მოითხოვენ.

ფრანსუა ბაირუმ, თავისივე ინიციატივით, მთავრობისადმი ნდობის საკითხის დაყენების შესახებ 25 აგვისტოს განაცხადა. ამის მიზეზი გახდა ის, რომ ფრანსუა ბაირუ ვერ ახერხებდა პოლიტიკური ოპონენტების დარწმუნებას, მხარი დაეჭირათ მისი 2026 წლის ბიუჯეტის გეგმისთვის. ბაირუსა და მის მთავრობისთვის უნდობლობის გამოცხადების შემდეგ საფრანგეთის პრეზიდენტმა, ემანუელ მაკრონმა ქვეყნის ახალ პრემიერმინისტრად სებასტიან ლეკორნუ დანიშნა.