"ლელო — ძლიერი საქართველოს" ერთ-ერთი ლიდერი, პატიმრობაში მყოფი, ბადრი ჯაფარიძე 2 სექტემბერს სინდისის პატიმრებისთვის, მათ შორის, ორი თანაპარტიელისთვის — ვეფხია კასრაძისა და ვასილ კაძელაშვილისთვის, გამოტანილ განაჩენს სოციალურ ქსელში ეხმაურება. მისი თქმით, გამოტანილი განაჩენი ცხადყოფს, რომ ეს საქმე არ ემყარება მტკიცებულებებს და აბსოლუტურად უსაფუძვლოა.

"ჩვენი თანამებრძოლების, ვეფხიას და ვასილის მიმართ გამოტანილმა დღევანდელმა უსამართლო განაჩენმა კიდევ ერთხელ დაგვარწმუნა, რომ სამართლებრივი ინსტიტუტები, რომლებიც ამ ქვეყანაში კანონიერებასა და სამართლიანობას უნდა იცავდნენ, თავად იქცნენ პოლიტიკური დაკვეთების შესრულების ინსტრუმენტებად.

სასამართლოს მიერ გამოტანილი განაჩენი ცხადყოფს, რომ აღნიშნული საქმე არ ემყარება არც მტკიცებულებებს, არც სამართლის პრინციპებს და აბსოლუტურად უსაფუძვლოა.
მინდა, სოლიდარობა და მხარდაჭერა გამოვუცხადო ყველა იმ ადამიანს, ვინც დღეს პოლიტიკური დევნის მსხვერპლია. გახსოვდეთ, თქვენი სიმტკიცე და მორალური უპირატესობა აუცილებლად გახდება საფუძველი დიდი საზოგადოებრივი ცვლილებებისა.

ჩვენ არ ვიბრძვით შურისძიებისთვის, ჩვენ ვიბრძვით სამართლიანობისთვის, ადამიანური ღირსებისთვის და თავისუფალი საქართველოსთვის. ეს ბრძოლა არის ქვეყნისთვის, სადაც სასამართლო ემსახურება არა ხელისუფალს, არამედ სამართლის უზენაესობას.

საქართველო აუცილებლად იქნება დემოკრატიული სახელმწიფო!

ბადრი ჯაფარიძე
საკანი 214", — წერს ჯაფარიძე.

ცნობისთვის, თამარ მჭედლიშვილის გადაწყვეტილებით, ზვიად ცეცხლაძეს 2 წლითა და 6 თვით პატიმრობა მიესაჯა. ის მუხლის გადაკვალიფიცირების შემდეგ დამნაშავედ იქნა ცნობილი სისხლის სამართლის 226-ე მუხლით გათვალისწინებულ დანაშაულში, რაც გულისხმობს ჯგუფური მოქმედების ორგანიზებას, რომელიც არღვევს საზოგადოებრივ წესრიგს, ან მასში აქტიური მონაწილეობას.

ამავე მუხლით გადაუკვალიფირდათ დანაშაული ვეფხია კასრაძეს და ვასილ კარძელაშვილს და მათაც 2 წლით და 6 თვით პატიმრობა მიესაჯათ.

ინსაფ ალიევს, თორნიკე გოშაძეს, გიორგი გორგაძეს, ნიკოლოზ ჯავახიშვილს და ირაკლი მიმინოშვილს 2-2 წლიანი პატიმრობა მიესაჯა.