"ყველამ — მტერმაც და მოყვარემაც იცის, თუ რა ფასი ჰქონდა მამუკა მდინარაძეს პარლამენტში", — თქვა ოცნების პარლამენტის თავმჯდომარემ, შალვა პაპუაშვილმა "რუსთავი 2-ის" ეთერში და აღნიშნა, რომ აღნიშნული საკადრო ცვლილება, ქვეყანასა და რეგიონში უსაფრთხოების მიმართულებით გამოწვევებიდან გამომდინარე, საჭირო იყო.

"ცვლილება იმიტომ გახდა საჭირო, რომ ბატონმა ანრი ოხანაშვილმა, სახელმწიფო უსაფრთხოების სამსახურის ხელმძღვანელმა გადაწყვიტა თანამდებობის დატოვება. მან ამასთან დაკავშირებით თავად გააკეთა განცხადება და განმარტა კიდევაც და ჩემი მხრიდან არაკორექტული იქნება მისი განცხადება და განმარტებები კიდევ ერთხელ განვმარტო. შესაბამისად, წარმოშობილი ვაკანსიის პირობებში, მნიშვნელოვანი იყო შერჩეულიყო ისეთი ადამიანი, რომელიც იმ გამოწვევების ფონზე, რომელიც ქვეყანას, რეგიონს, მსოფლიოს უსაფრთხოების მიმართულებით აქვს, ამ ფუნქციას საუკეთესოდ შეასრულებდა და იცით, რომ მთავრობა წარმოადგენს ბატონი მამუკა მდინარაძის კანდიდატურას. რა თქმა უნდა, ის დიდი დანაკლისი იქნება პარლამენტისთვის და უმრავლესობისთვის. ყველამ — მტერმაც და მოყვარემაც იცის, თუ რა ფასი ჰქონდა მამუკა მდინარაძეს პარლამენტში, მისი მნიშვნელობა საპარლამენტო უმრავლესობისათვის, საპარლამენტო საქმიანობისთვის, ის ცოდნა-გამოცდილება, მათ შორის საპარლამენტო საქმიანობის, რომელიც მას აქვს, როგორც გუნდისთვის, ისე პარლამენტისთვის მნიშვნელოვანი იყო. თუმცა, რა თქმა უნდა, ის გამოწვევები, რომელიც ქვეყანას და რეგიონს აქვს, უსაფრთხოების მიმართულებით, საჭირო იყო, რომ აქ იყოს ადამიანი, რომელიც პროფესიული ცოდნით და კვალიფიკაციით, ისე პოლიტიკური ალღოთი, შეძლებდა ამ ტვირთის აწევას," — თქვა პაპუაშვილმა.

ოცნების პრემიერმა სუს-ის ხელმძღვანელად ოცნების ერთ-ერთი ლიდერი მამუკა მდინარაძე 23 აგვისტოს წარადგინა. მანამდე, ანრი ოხანაშვილმა სოციალურ ქსელში უწყებიდან წასვლის შესახებ გაავრცელა განცხადება. კობახიძის ცნობით, ანრი ოხანაშვილი ეროვნული უსაფრთხოების საკითხებში ოცნების პრემიერის მრჩეველი გახდება.

ასევე იხილეთ: