"მამუკა არის კარგი ქართველი კაცი, რომელსაც უყვარს თავისი ქვეყანა", — თბილისის მერი კახა კალაძე ოცნების ერთ-ერთი ლიდერის, მამუკა მდინარაძის სუს-ის უფროსად დანიშვნას ეხმაურება. მისი თქმით, მას "ჰყავს ძალიან კარგი ოჯახი და ამ ქვეყნის პატრიოტია".

"მამუკა წარმატებული ადამიანია. ის წლების განმავლობაში სხვადასხვა თანამდებობას იკავებდა საქართველოს პარლამენტში, გახლავთ პარტია „ქართული ოცნება - დემოკრატიული საქართველოს“ აღმასრულებელი მდივანი. ის არის კარგი ქართველი კაცი, რომელსაც უყვარს თავისი ქვეყანა, ჰყავს ძალიან კარგი ოჯახი. არის ამ ქვეყნის პატრიოტი და საპასუხისმგებლო თანამდებობაზე, რასაც უსაფრთხოების სამსახური ჰქვია მინდა გულწრფელად წარმატებები ვუსურვო მას. ამ სამსახურის სწორი და გამართული მუშაობა ერთობ მნიშვნელოვანია ჩვენი ქვეყნისთვის და მისი მომავლისთვის", — განაცხადა კახა კალაძემ.

23 აგვისტოს ოცნების პრემიერმა სუს-ის ხელმძღვანელად ოცნების ერთ-ერთი ლიდერი მამუკა მდინარაძე წარადგინა. მანამდე, ანრი ოხანაშვილმა სოციალურ ქსელში უწყებიდან წასვლის შესახებ გაავრცელა განცხადება. კობახიძის თქმით, ანრი ოხანაშვილი ეროვნული უსაფრთხოების საკითხებში პრემიერმინისტრის მრჩეველი გახდება.