"ანრი მაგარი ბიჭია, მადლობა მას, მნიშვნელოვანი რეფორმები განახორციელა", — ასე გამოეხმაურა ქართული ოცნების წევრი ირაკლი ზარქუა სუს-ში განხორციელებულ საკადრო ცვლილებებს. მისი თქმით, სახელმწიფო უსაფრთხოების სამსახურის ხელმძღვანელის პოზიციაზე ანრი ოხანაშვილის შემცვლელად წარდგენილი მამუკა მდინარაძე "საკმაოდ გამოცდილი და კვალიფიციური კადრია".

"ანრი მაგარი ბიჭია, მადლობა მას, მნიშვნელოვანი რეფორმები განახორციელა. შიგნით დაალაგა მთელი რიგი ისინი, ცოტა ქაოსი იყო. ეს შიდა სამსახურებრივი ისაა და საჯარო არის. არც თქვენ უნდა გქონდეს ამაზე წვდომა და ინფორმაცია და არც სხვას. მდინარაძე საკმაოდ გამოცდილი, კვალიფიციური, ძალიან მნიშვნელოვანი კადრია. ასე რომ ორივე ღირსეული გუნდის ღირსეული წარმომადგენლები არიან", — აცხადებს ირაკლი ზარქუა სუს-ში განხორციელებულ საკადრო ცვლილებაზე "ტვ პირველთან".

23 აგვისტოს ოცნების პრემიერმინისტრმა, ირაკლი კობახიძემ სუს-ის ხელმძღვანელის პოზიციაზე მამუკა მდინარაძე წარადგინა. მანამდე სახელმწიფო უსაფრთხოების სამსახურმა გაავრცელა განცხადება, სადაც აღნიშნულია, რომ ანრი ოხანაშვილი სუს-ის უფროსის თანამდებობას ტოვებს და ეროვნული უსაფრთხოების საკითხებში ოცნების პრემიერმინისტრის მრჩეველი ხდება.