ჭყონდიდის, ცაგერისა და ლენტეხის ეპარქიის მიტროპოლიტი სტეფანე (კალაიჯიშვილი) ქვემო ბეთლემის მაცხოვრის შობის ტაძრის წინამძღვარს, არქიმანდრიტ დოროთე ყურაშვილს დაუპირისპირდა. მან ქადაგებისას თქვა, რომ დოროთე ყურაშვილი "მწვალებლობას ქადაგებს" და მისით სინოდის კომისია უნდა დაინტერესდეს.

ცნობისათვის, არქიმანდრიტი დოროთე ყურაშვილი სინდისის პატიმრების და პროევროპული აქციების გულშემატკივარია. ის მხარდაჭერას უცხადებს უკანონოდ დაკავებულებს და "ოცნების" ხელისუფლებას ღიად აკრიტიკებს.

"ან მოინანიოს, ან ამაზე ყველაფერზე პასუხი უნდა აგოს. ახლა ქადაგებს მწვალებლობას, მაგრამ "მწვალებლის" სახელი რომ ეწოდოს, ამისთვის უნდა გასამართლდეს ეკლესიური წესით. სინოდის კომისიას, რომელიც ამ საკითხებს განიხილავს, მე ვთხოვ, ყურადღება მიექცეს ამ ადამიანის ქადაგებებს და მათ მიმართ მიიღონ ზომა, რაც არის საჭირო. თუ მოინანიებს, ღმერთმა შეუნდოს. რაღაც პერიოდი მაინც დავაყენოთ, რომ გაჩერდეს, ზედმეტად არ ილაპარაკოს რაღაცები. თუ გააგრძელებს ასე ლაპარაკს, ასეთი რამეების მოწოდებას, მაშინ ყველამ იცოდეს, რომ ეს არ არის ეკლესიის მქადაგებელი, არის არის მწვალებელი, რომელიც სახარების სახელით ცდილობს ადამიანების შეცდომაში შეყვანას", — მიტროპოლიტ სტეფანეს კომენტარს ფორმულა ავრცელებს.

მიტროპოლიტის განცხადებას საზოგადოების ნაწილის აღშფოთება მოჰყვა. ისინი სოციალურ ქსელში მხარდაჭერას უცხადებენ არქიმანდრიტ დოროთე ყურაშვილს და მადლობას უხდიან "ქრისტიანობისა და სახელმწიფოებრივი აზროვნებისთვის".

ამის შემდეგ, არქიმანდრიტმა დოროთე ყურაშვილმა სოციალურ ქსელში მადლობა გადაუხადა ყველას თანადგომისთვის და ხალხს ქვეყნის დასაცავად ერთიანობისკენ მოუწოდა.

"მადლობა ყველას, ვინც სიმართლის გულისთვის იბრძვით. მადლობა ყველას, ვინც საქართველოს თავისუფლებისთვის და დამოუკიდებლობისთვის იბრძვით. და მადლობა ყველას, ვინც თანადგომა გამომიცხადეთ.

მინდა გითხრათ, რომ, თქვენ ჩემ გვერდით დგახართ და მე თქვენ გვერდით ვდგავარ ჩემს და თქვენს ქრისტესთან ერთად. და ჩვენ, ყველა ერთად, ვინც ნათელ მხარეს ვართ, ვდგავართ საქართველოს სადარაჯოზე, არა მხოლოდ დღევანდელი საქართველოს სადარაჯოზე, არამედ წარსული, აწმყო და მომავალი საქართველოსი.

გაერთიანდით, გაძლიერდით და დაიცავით ჩვენი დიდებული საქართველო. მადლობა, რომ ასეთი გონიერები და უშიშრები ხართ. მე თქვენი აღმოჩენით საქართველოს უდრეკი სული აღმოვაჩინე და ასეთი გახარებული არასოდეს, არასოდეს, არასოდეს ვყოფილვარ. საქართველო ცოცხალია.

დიდება საქართველოს!

დიდება უკრაინას!

დიდება ქართველ და უკრაინელ გმირ ხალხს!

ჩვენ გამარჯვებულები ვართ", — წერს არქიმანდრიტი დოროთე ყურაშვილი.