კრემლის ლიდერი ვლადიმირ პუტინი მომავალ კვირას ოთხდღიანი ვიზიტით ჩინეთს ეწვევა. ამის შესახებ უკრაინული მედია რუსულ წყაროებზე დაყრდნობით წერს.

ვიზიტის ფარგლებში ფართომასშტაბიანი მოლაპარაკებებია დაგეგმილი, თუმცა შეხვედრების თემები ამ ეტაპზე საჯაროდ არ არის ცნობილი.

უკრაინული მედიის ცნობით, პუტინი, სავარაუდო შანხაის თანამშრომლობის ორგანიზაციის სამიტსაც დაესწრება, რომელიც ტიანძინში 31 აგვისტოდან 1 სექტემბრის ჩათვლით გაიმართება.

RT-ის ცნობით, ჩინეთის ლიდერი სი ძინპინიც უცხოელ ლიდერებთან და საერთაშორისო სტრუქტურების წარმომადგენლებთან შეხვედრებს გამართავს.

ივლისში The Times-მა დაწერა, რომ სი ძინპინს აშშ-ის პრეზიდენტ დონალდ ტრამპთან და პუტინთან სამმხრივი შეხვედრის ორგანიზება სურდა. გამოცემის ინფორმაციით, სი ძინპინი სექტემბრის აღლუმზე ტრამპისთვის მოწვევის გაგზავნას გეგმავდა. ეს ღონისძიება ჩინეთში მეორე მსოფლიო ომის დასრულებას მიეძღვნება.

კრემლმა მოგვიანებით უარყო ეს ინფორმაცია. პუტინის პრესმდივანმა, დმიტრი პესკოვმა განაცხადა, რომ მოსკოვს არ აქვს ცნობები სამმხრივი შეხვედრისთვის მოსამზადებელი ნაბიჯების შესახებ.

ცნობისთვის, სი ძინპინი და პუტინი ბოლოს მაისში შეხვდნენ, როდესაც ჩინეთის ლიდერი მოსკოვში 9 მაისის გამარჯვების დღის ღონისძიებებზე ჩავიდა.