ნორვეგია უკრაინის საჰაერო თავდაცვისთვის 7 მილიარდამდე კრონს გამოყოფს, რაც დაახლოებით 695.7 მილიონი დოლარია. საერთაშორისო მედიის ინფორმაციით, ამის შესახებ განცხადებებს ნორვეგიის მთავრობის ოფიციალურ პირები აკეთებენ.

ნორვეგიის პრემიერმინისტრის, იონას გარ სტიორეს თქმით, საჰაერო თავდაცვის სისტემები უკრაინას გერმანიიდან მიეწოდება. როგორც მან აღნიშნა, გერმანია და ნორვეგია "ძალიან მჭიდროდ თანამშრომლობენ".

"გერმანიასთან ერთად, უზრუნველყოფთ, რომ უკრაინამ მიიღოს ძლიერი საჰაერო თავდაცვის სისტემები. გერმანია და ნორვეგია ძალიან მჭიდროდ თანამშრომლობენ, რათა მხარი დაუჭირონ უკრაინას ქვეყნისა და მშვიდობიანი მოსახლეობის რუსული საჰაერო თავდასხმებისგან დაცვის ბრძოლაში," — განაცხადა ნორვეგიის პრემიერმა.

მედიის ცნობით, როგორც ნორვეგიის მთავრობაში ამბობენ, ნორვეგია და გერმანია Patriot-ის ორ სისტემას, მათთვის განკუთვნილი რაკეტების ჩათვლით აფინანსებენ. ამასთან, ნორვეგია მონაწილეობს გერმანული მწარმოებლის Hensoldt-ისგან საჰაერო თავდაცვის რადარების და Kongsberg-ისგან საჰაერო თავდაცვის სისტემების შეძენაში.

შეგახსენებთ, შეერთებულმა შტატებმა და NATO-მ უკრაინის ამერიკული იარაღით მომარაგების ახალი მექანიზმი — უკრაინის პრიორიტეტული მოთხოვნების სია (PURL) აამოქმედეს, რომელიც ალიანსის სხვა წევრების შენატანებით დაფინანსებას ითვალისწინებს. ნიდერლანდებმა, PURL-ის ფარგლებში, მოამზადა 500 მილიონი დოლარის დახმარების პაკეტი უკრაინისთვის, რომელიც Patriot-ის საჰაერო თავდაცვის სისტემის კომპონენტებსა და რაკეტებს მოიცავდა.

შვედეთი, ნორვეგია და დანია ერთობლივად დაახლოებით 500 მილიონ დოლარს გამოყოფენ. მათ შეუერთდება ლატვიაც, თუმცა თანხის საბოლოო ოდენობა ჯერ კიდევ შეთანხმების პროცესშია.