გამოცემა "მთის ამბების" ინფორმაციით, ხარაგაულის მუნიციპალიტეტში მეწყერმა ყარნებას ხეობა ჩაკეტა და 2 საათზე მეტია მდინარე გუბდება.

ადგილობრივებმა გამოცემას უთხრეს, რომ წყლის დაგუბებისა და გამოხეთქვის შემთხვევაში, საფრთხე ემუქრება სოფლებს ლაშეს, ძირულას და თბილისი-ბათუმის სარკინიგზო მაგისტრალს.

"ბევრი წყალი თუ დაგუბდა და შემდეგ ჩამოწოლილი მასა გაარღვია, პირველ რიგში სოფელ ლაშეს დააზიანებს. დიდი სოფელია საკმაოდ. საფრთხეს შეუქმნის თბილისი-ბათუმის რკინიგზას, მერე ქვემოთ სოფლებსაც, ზესტაფონისკენ," — უთხრა "მთის ამბებს" ერთ-ერთმა ადგილობრივმა.

მათივე თქმით, მეწყერის გააქტიურება მოსალოდნელი იყო.

"დაახლოებით ორი საათის წინ, მთის დიდი ნაწილი მოწყდა და მდინარე ყარნება გადაკეტა, რაც მოსალოდნელი იყო და ვამბობდით კიდეც, რომ ასე მოხდებოდა. წყალი გუბდება და საკმაოდ საშიში მდგომარეობაა," — ციტირებს გამოცემა ერთ-ერთ ადგილობრივს.