"დარწმუნებული ვარ, რომ ასე არ იქნება, არ ვიცი, ეს არის ჩემი რწმენა", — ასე უპასუხა ოცნების პრემიერმინისტრმა, ირაკლი კობახიძემ ბახმაროში "ტვ პირველის" ჟურნალისტის კითხვას, შეიძლება თუ არა გამოძიება ყოფილი პრემიერმინისტრით, ირაკლი ღარიბაშვილით დაინტერესდეს.

"სპეკულაციური, არასწორი და არაჯანსაღი კითხვები დავასრულოთ. დარწმუნებული ვარ, ასე არ იქნება, არ ვიცი, ეს არის ჩემი რწმენა.

ირაკლი ღარიბაშვილთან კომუნიკაციაზე კი, კი არაერთხელ მქონდა ბოლო პერიოდის განმავლობაში, მათ შორის მას შემდეგ, რაც მან დატოვა პარტიის თავმჯდომარის თანამდებობა. თუ არ ვცდები, ერთხელ თუ ორჯერ მქონდა კომუნიკაცია რაღაც თემებზე", — განაცხადა ირაკლი კობახიძემ.

რაც შეეხება კითხვას — რატომ არ იმყოფებოდა ის ქართული ოცნების თბილისის მერობის კანდიდატის წარდგენაზე, კობახიძემ განაცხადა, რომ ირაკლი ღარიბაშვილი "პოლიტიკიდან გავიდა".

კითხვაზე — შეიძლება თუ არა, რომ ირაკლი ღარიბაშვილმა თავისი პარტია შექმნას, კობახიძემ თქვა, რომ "ვერაფერს იტყვის".

"არ ვიცი, მე ვერაფერს გეტყვით პარტიებთან დაკავშირებით. ჩვენ გვაქვს ჩვენი პარტია, ამოცანა იცით, რაც არის — 64/64-ზე. სიმართლე გითხრათ, არ მგონია [რომ ღარიბაშვილმა შესაძლოა პარტია შექმნას], მაგრამ მე, როგორ გითხრათ, სხვის მაგივრად, ვინ, რა შეიძლება დააპიროს. არ მგონია", — განაცხადა ირაკლი კობახიძემ.