უკრაინის სპეცსამსახურები ყირიმის ხიდზე ტერაქტს გეგმავდნენ, 130 კილოგრამი ასაფეთქებელი ნივთიერება კი რუსეთში საქართველოს გავლის ავტომობილით შევიდა. ამის შესახებ ინფორმაცია რუსეთის უშიშროების ფედერალური სამსახური (FSB) ავრცელებს.

მათ მიერ გავრცელებული ინფორმაციით, ტერორისტულ აქტს უკრაინის სპეცსამსახურები ამზადებდნენ, რომლის ფარგლებშიც ხიდზე მსუბუქი ავტომობილის აფეთქებას გეგმავდნენ.

ჰიბრიდული Chevrolet Volt, რომლის აკუმულატორშიც 130 კილოგრამი ფინური წარმოების სინთეზური ასაფეთქებელი ნივთიერება ქაფის სახით იყო ჩასხმული, უკრაინიდან რუსეთში რამდენიმე ქვეყნის გავლით გადაჰქონდათ. ის რუსეთის ფედერაციაში საქართველოდან ზემო ლარსის სასაზღვრო გამშვები პუნქტის გავლით შემოვიდა. შემდეგ კერძო მძღოლის საკუთრებაში არსებულ ავტომზიდით კრასნოდარის მხარეში უნდა გადაეტანათ, სადაც დაგეგმილი იყო მისი სხვა მძღოლისთვის გადაცემა, რომელიც ავტომობილს ყირიმის ხიდის გავლით ყირიმში ჩაიყვანდა და უნებლიე თვითმკვლელ ტერორისტად გადაიქცეოდა.

სპეციალურმა სამსახურმა ასევე გამოაქვეყნა ვიდეო, სადაც ნაჩვენებია დანაღმული მანქანის საბარგულის გახსნა და ასაფეთქებელი ნივთიერებების ამოღება.

გარდა ამისა, ვიდეოში ნაჩვენებია ორი ადამიანის დაკავება და ერთ-ერთი მძღოლის დაკითხვა, რომელიც ტერორისტული თავდასხმისთვის უნდა გამოეყენებინათ. ის ვიდეოში ამბობს, რომ მისთვის ევროპული ქვეყნიდან Mercedes Sprinter-ის ჩამოყვანა იგეგმებოდა.

FSB-მ აღნიშნა, რომ 2025 წელს ეს უკვე უკრაინის სპეცსამსახურების მეორე მცდელობაა, ყირიმის ხიდის საბოტაჟისთვის დიდი რაოდენობით ასაფეთქებელი ნივთიერებებით სავსე ავტომობილები გამოიყენონ.