სამშენებლო კომპანია ცენტრ პოინტის სამეთვალყურეო საბჭოს თავმჯდომარე, გუკა რჩეულიშვილი ამბობს, რომ კომპანიის წილების გაყიდვაზე მოლაპარაკებები დასრულებულია და ახლა მხოლოდ ტექნიკური დეტალები დარჩა მოსაგვარებელი. ამის შესახებ რჩეულიშვილმა On.ge-სთან საუბრისას აღნიშნა.

კომპანიის სამეთვალყურეო საბჭოს თავმჯდომარე მყიდველის ვინაობას არ ამხელს.

"ჩვენ პირობებზე შევთანხმდით, მზად ვართ გავცეთ კომპანია. მთავარი პირობა ყველა დაზარალებულების დაკმაყოფილებაა", - ამბობს რჩეულიშვილი და განმარტავს, რომ ცენტრ პოინტის მიერ მიღებული შემოსავალი მოხმარდება სხვა, დარჩენილი ვალდებულებების გასტუმრებას.

ცენტრ პოინტის საქმეზე რუსუდან კერვალიშვილსა და მის დას, მაია რჩეულიშვილს თბილისის საქალაქო სასამართლომ ოთხი წლით თავისუფლების აღკვეთა მიუსაჯა. ამავე საქმეზე იყო დაკავებული გუკა რჩეულიშვილიც, რომელსაც სასამართლომ მოგვიანებით აღკვეთის ღონისძიებად გირაო შეუფარდა.

კერვალიშვილისა და რჩეულიშვილისთვის ბრალის მისჯის დროს პროკურატურა აცხადებდა, რომ როგორც გამოძიების ეტაპზე, ისე საქმის სასამართლოში განხილვისას ბრალდებულებთან გააფორმებდა საპროცესო შეთანხმებას პირობით მსჯავრზე თუ 6 000-მდე დაზარალებულს მიყენებული ზიანი სრულად აუნაზღაურდებოდათ.