ოსკარის მფლობელი კომპოზიტორი, ჰანს ციმერი, Euphoria-ს მესამე სეზონს უერთდება. სერიალისთვის სიმღერების შესაქმნელად ასევე ბრუნდება მუსიკოსი — Labrinth.

"ჩემთვის ძალიან დიდი პატივია შევუერთდე გუნდს, რომელსაც სემ ლევინსონი ხელმძღვანელობს", — განაცხადა ციმერმა —" Labrinth-ის მუსიკამ შოუს იდენტობა შექმნა და მოუთმენლად ველოდები, რომ მუსიკის საშუალებით ჩემი წვლილი შევიტანო ახალი სეზონის შექმნაში".

ჰანს ციმერი მრავალგზის ჯილდოს მფლობელი კომპოზიტორია, მას შექმნილი აქვს მუსიკა ისეთი ფილმებისთვის, როგორებიცაა — ინტერსტელარი, მეფე ლომი, გლადიატორი, დასაწყისი და ა.შ. მის ბოლოდროინდელ ნამუშევრებს შორისაა დენი ვილნევის დიუნი (ორივე ნაწილი), ბრედ პიტის მიერ გადაღებული ფილმი ფორმულა 1.

ფოტო: The Talks

რაც შეეხება Labrinth-ს, მან სერიალის ორივე სეზონი მუსიკალურად გააფორმა და ზენდეიასთან ერთად შექმნა ისეთი სიმღერები, როგორებიცაა — All for Us, I’m Tired, Formula და ა.შ

"ძალიან დიდი პატივია ჰანსთან ერთად მუშაობა, — თქვა Euphoria-ს შემქმნელმა სემ ლევინსონმა — "ძალიან ვამაყობ Labrinth-თან თანამშრომლობით და მოხარული ვარ, რომ ჰანსი სერიალს ახალ მწვერვალზე აიყვანს".

Euphoria-ს მრავალჯერ გადადებული მესამე სეზონის გადაღებები საბოლოოდ წელს დაიწყო. სერიალში მთავარი მსახიობების უმეტესობაც დაბრუნდა, მათ შორის არიან — ზენდაია, სიდნი სვინი, ჰანტერ შაფერი, ჯეიკობ ელორდი, ერიკ დეინი, ალექსა დემი, მოდ აპატოუ, მართა კელი, ქლოე ჩერი და დომინიკ ფაიკი.

მესამე სეზონში სერიალში ახალ სახეებსაც ვიხილავთ, მათ შორის — შერონ სტოუნს, როზალიას, მარშონ ლინჩს, კადიმ ჰარდისონს, ადევალე აკინუოიე-აგბაჯეს, ტობი უოლესს, დარელ ბრიტ-გიბსონს, პრისცილა დელგადოს, ჯეიმს ლენდრი ჰებერტსა და ანა ვან პატენს.

ფოტო: HBO

სერიალის მესამე სეზონის გამოსვლის თარიღი, ჯერჯერობით, უცნობია, თუმცა მის გამოსვლას, სავარაუდოდ, 2026 წლისთვის უნდა ველოდოთ