დღეს, 26 სექტემბერს, პარლამენტმა კონსტიტუციის პროექტი მესამე მოსმენით განიხილა და დაამტკიცა. ახალ კონსტიტუციას მხარი 117-მა პარლამენტარმა დაუჭირა, წინააღმდეგი კი მხოლოდ ორი იყო. ამასთან, ოპოზიციური პარტიებიდან სხდომას მხოლოდ პატრიოტთა ალიანსის 3 დეპუტატი ესწრებოდა, რაც იმას ნიშნავს, რომ ქართული ოცნების დეპუტატების გარდა კონსტიტუციის პროექტის მიღებას პატრიოტების ერთ-ერთმა დეპუტატმა მისცა ხმა. პარტიის ლიდერი, ირმა ინაშვილი ამ ფაქტს ტექნიკურ შეცდომად აფასებს და მის გამოძიებას ითხოვს.

ადა მარშანია, ნატო ჩხეიძე და ემზარ კვიციანი - სამივე დეპუტატი, რომელიც სხდომას ესწრებოდა, მედიასთან კონსტიტუციის პროექტს აკრიტიკებდა როგორც კენჭისყრამდე, ასევე, კენჭისყრის შემდეგ. ირმა ინაშვილის განმარტებით, კენჭისყრის სისტემა მწყობრში არაა:

"ეს იმას ნიშნავს, რომ ამ არასაიმედო სისტემით ხშირად, სხვა დროსაც ხდება კენჭისყრის შედეგების შეცვლა, მანიპულირება, გაყალბება, რაც გამოძიების საგნად უნდა იქცეს. სწორედ ამიტომ, დღევანდელი კენჭისყრის შემდეგ, ვითხოვ დაიწყოს გამოძიება ამ ფაქტის ირგვლივ."