"იქნებ საზღვაო ტრანსპორტის სააგენტომ აუხსნას მთავრობის მეთაურს, რომ რაც უვიზო მიმოსვლა დავიწყეთ ევროპაში, მკვეთრად გაიზარდა მოთხოვნა ქართველ მეზღვაურებზე" — ასე პასუხობს ქართველ მეზღვაურთა გაერთიანება ოცნების პრემიერს, ირაკლი კობახიძეს, რომელმაც განაცხადა, რომ ევროკავშირში უვიზო მიმოსვლა "ეგზისტენციალური საკითხი არ არის".

ქართველ მეზღვაურთა გაერთიანების განცხადებით, "თუ ქართველ მეზღვაურებს ვიზა დასჭირდათ, მათ კვლავ ფილიპინელები და ინდოელები ჩაანაცვლებენ". მათი თქმით, ამ შემთხვევაში პირობები გაუარესდება და მოუწევთ მიზერულ თანხაზე იმუშაონ.

"მეზღვაურებო, "ეგზისტენციალური" საკითხია თუ არა ვიზალიბერალიზაცია ჩვენთვის?

იქნებ საზღვაო ტრანსპორტის სააგენტომ აუხსნას მთავრობის მეთაურს, რომ რაც უვიზო მიმოსვლა დავიწყეთ ევროპაში, მკვეთრად გაიზარდა მოთხოვნა ქართველ მეზღვაურებზე, დასაქმდა უფრო მეტი მეზღვაური და უფრო ხელსაყრელი პირობებით!

ქართველ მეზღვაურებს თუ შენგენი დაჭირდა, ისევ ფილიპინელები და ინდოელები ჩაგვანაცვლებენ.

გაქრება ის პრიორიტეტი რაც გვქონდა, სხვა ქვეყნის მეზღვაურებთან შედარებით.
ყველამ კარგად იცის რომ დღეს საზღვაო კომპანიები ყველა შაურს ითვლიან რაც მეზღვაურის გემზე აყვანას და დასაქმებას უკავშირდება.

კომპანიები კონკურენციის დროს იმ მეზღვაურს ანიჭებს უპირატესობას რომელიც უფრო ნაკლებ ხარჯს მოითხოვს, ამიტომ ქართველ მეზღვაურებს უარს ეტყვიან ხშირად, ან აიძულებენ დაბალ ხელფასზე დათანხმდნენ მუშაობას როგორც ფილიპინელები და ინდოელები თანხმდებიან. უბრალოდ ძალიან "ტეხავს" რა, როცა ჩვენი ქვეყანა ისევ მეორე მეორე ქვეყნების სიაში მოხდება დამსაქმებლების თვალში.

მე დიდი იმედი მაქ რომ ეგრე არ მოხდება მაგრამ დღეს პრემიერმა ისე თქვა მაგით არავის არაფერი დიდად არ დააკლდებაო, მგონი მეზღვაურები დავავიწყდით. ჩვენ ნამდვილად დაგვეტყობა ეგ ცვლილებები, მითუმეტეს რეიტინგებს…

ტოპ 4-ბი ვგონებ ცოტა იოლად დაალაგებენ მაგ პრობლემებს.

ამ ამბავში ერთი სხვა უბედურებაც იჩენს თავს, საზღვაო ადმინისტრაციის დირექტორს როგორც აღმოჩნდა სულაც არ ცალია ჩვენთვის, ისეთ საქმეებში ყოფილა გახვეული რომ ეჭვი მეპარება მეზღვაურებზე ეფიქრებოდეს ახლა ან მომავალში იფიქროს.

ვინ უნდა იყოს ჩვენი ხმა ამ მოცემულობაში, ვინ უნდა იზრუნოს ჩვენ ინტერესებზე ან მის გახმოვანებაზე?

ვგონებ დროა დირექტორებს მეზღვაურები ირჩევდეს და არა ეკონომიკის სამინისტროდან ინიშნებოდეს.

კანდიდატურებმა უნდა შეიტანონ განცხადება ადმინისტრაციაში და მოქმედმა მეზღვაურებმა უნდა აირჩიოს რომელიმე.

ბაზას არ ჭირდება შექმნა, ადმინისტრაციას ყველა მოქმედი მეზღვაური ჰყავს აღრიცხული ამიტომ იოლზე იოლი იქნება ამ სისტემით ახალი დირექტორის არჩევა.

პროფესიონალების არჩეული კანდიდატი ყოველთვის უფრო კვალიფიციური და ერთგული იქნება საქმის მიმართ" — აღნიშნულია ქართველ მეზღვაურთა გაერთიანების განცხადებაში, რომელიც Facebook-ზე გამოქვეყნდა.

ოცნების პრემიერმა ირაკლი კობახიძემ გუშინ, 17 ივლისს, ჟურნალისტებთან საუბრისას განაცხადა, რომ ვიზალიბერალიზაცია ეგზისტენციალური საკითხი არ არის.

"მშვიდობა სტაბილურობა, მათ შორის, ოჯახური ღირებულებები, ეს არის ეგზისტენციალური საკითხი. ვიზით, თუ უვიზოდ ეს არ არის ეგზისტენციალური საკითხი. როცა ეგზისტენციალური საკითხი უპირისპირდება არაეგზისტენციალურ საკითხს, შენ უპირატესობა უნდა მიანიჭო ეგზისტენციალურ საკითხს," — თქვა კობახიძემ.

ასევე იხილეთ: