"თუ დადგება საკითხი — ან მშვიდობა და სტაბილურობა, ან ვიზალიბერალიზაცია, ჩვენ, რა თქმა უნდა, უპირატესობას მივანიჭებთ მშვიდობას და სტაბილურობას", — ამის შესახებ "ოცნების" პრემიერმა, ირაკლი კობახიძე ვიზალიბერალიზაციის შესაძლო შეჩერებაზე საუბრისას განაცხადა.

კობახიძის თქმით, ვიზალიბერალიზაცია ნიშნავს იმას, რომ საქართველოს მოსახლეობას დასჭირდება ვიზა ევროპაში გასამგზავრებლად. უვიზო მიმოსვლა ეს არ არის ეგზისტენციალური საკითხი, მშვიდობა და სტაბილურობა კი ეგზისტენციალური საკითხია.

"როცა იყო საბჭოთა კავშირი, მოსკოვშიც ასე ხედავდნენ. უარგუმენტოდ ითხოვდნენ რაღაცებს. ჩვენ გვჭირდება არგუმენტები. კიდევ ერთხელ გავიმეორებ — ბრიუსელი არ უნდა დაემსგავსოს საბჭოთა მოსკოვს", — უპასუხა კობახიძემ.

ჟურნალისტის კითხვაზე, გადაწყვეტილება მიღებულია, სადავო კანონებს არ გააუქმებთ? კობახიძე პასუხობს, რომ "კანონები არის პრინციპულად მნიშვნელოვანი იმისთვის, რომ საქართველოში იყოს დაცული ფასეულობები არასრულწლოვანთა ინტერესები და არ დავუშვათ რევოლუციური პროცესები“.

ჟურნალისტის კითხვაზე — ხართ თუ არ პასუხისმგებელი ვიზალიბერალიზაციის შესაძლო შეჩერებაზე, ოცნების პრემიერმა განაცხადა, რომ მათი ხელისუფლება პასუხისმგებელია "მშვიდობადა და სტაბილურობაზე.

"პასუხისმგებლები ვართ იმაზე, რომ საქართველოში იყოს შენარჩუნებული მშვიდობა, სტაბილურობა, განვითარება. ყველაზე მთავარი სიკეთე არის მშვიდობა და სტაბილურობა. გამჭვირვალობის კანონი იცავს ჩვენს სახელმწიფოს სწორედ ასეთი პროცესებისგან, ექსტრემიზმისგან. როცა გეუბნებიან, რომ შენ არ უნდა მიიღო კანონი, რომელიც უცხო ძალებს უზღუდავს ქვეყანაში რევოლუციის მოწყობას, ეს იმას ნიშნავს, რომ გემუქრებიან სტაბილურობის და შემდეგ მშვიდობის დაკარგვით.

...თუ დადგება საკითხი, რომ ან მშვიდობა და სტაბილურობა, ან ვიზალიბერალიზაცია, ჩვენ, რა თქმა უნდა, უპირატესობას მივანიჭებთ მშვიდობას და სტაბილურობას. ეს ქართველი ხალხის არჩევანია.

ეს არის შანტაჟი. ვიზალიბერალიზაცია ნიშნავს იმას, რომ საქართველოს მოქალაქეს დასჭირდება ვიზა იმისათვის, რომ გაემგზავროს ევროპაში. მშვიდობა სტაბილურობა, მათ შორის, ოჯახური ღირებულებები, ეს არის ეგზისტენციალური საკითხი. ვიზით, თუ უვიზოდ ეს არ არის ეგზისტენციალური საკითხი. როცა ეგზისტენციალური საკითხი უპირისპირდება არაეგზისტენციალურ საკითხს, შენ უპირატესობა უნდა მიანიჭო ეგზისტენციალურ საკითხს", — განაცხადა ირაკლი კობახიძემ.