უკრაინის დასახმარებლად ამერიკის შეერთებული შტატების იარაღის შესყიდვას საფრანგეთი არ შეუერთდება — ამის შესახებ ინფორმაციას ორ ფრანგ ოფიციალურ პირზე დაყრდნობით, Politico ავრცელებს. ემანუელ მაკრონი, დიდი ხანია ევროპელებს ადგილობრივი წარმოების შეიარაღების შეძენისკენ მოუწოდებს და საკუთარი თავდაცვითი ინდუსტრიის გაძლიერებას ემხრობა. ასევე, საფრანგეთის მთავრობა თავად ცდილობს ბიუჯეტის ხარჯების შეკვეცას, რაც თავის მხრივ ართულებს ქვეყნის თავდაცვის ბიუჯეტის გაზრდას.

Politico-ს ცნობით, ოვალურ კაბინეტში NATO-ს გენერალურმა მდივანმა მარკ რუტემ ბრიტანეთისა და ნიდერლანდების გარდა ჩრდილოეთ ევროპის ოთხი ქვეყანა დაასახელა, რომლებიც უკრაინისთვის ამერიკული იარაღის მიწოდების გეგმას მხარს უჭერენ.

ევროპაში შეზღუდული საწარმოო შესაძლებლობების ფონზე, გერმანიის კანცლერის ფრიდრიხ მერცის მთავრობა მიიჩნევს, რომ აშშ-ში შეიარაღების შეძენა ერთადერთი გზაა, რომ უკრაინამ სწრაფად მიიღოს საჭირო შეიარაღება. კონკრეტულ შესყიდვებზე დეტალები ჯერ არ გაჟღერებულა, თუმცა უკრაინულ ქალაქებზე მომატებული დაბომბვების ფონზე, გერმანიის მთავრობა განსაკუთრებით აქტიურად ცდილობს აშშ-ში წარმოებული Patriot-ის საჰაერო თავდაცვის სისტემების შესყიდვის შეთანხმების მიღწევას.