საქართველოს პრეზიდენტი გიორგი მარგველაშვილი აცხადებს, რომ საქართველომ ტერიტორიული მთლიანობა უნდა აღადგინოს დიპლომატიური გზით, შერიგებით და არა – სამხედრო მოქმედებებით. ამის შესახებ პრეზიდენტმა თბილისის სახელმწიფო უნივერსიტეტში, ზვიად გამსახურდიას სახელობის აუდიტორიის გახსნისას, დღეს, 17 ივნისს, განაცხადა.

პრეზიდენტმა სტუდენტების შეკითხვებსაც უპასუხა და აქტუალურ მოვლენებზე ისაუბრა:

„ნამდვილად კარგი წინაპირობა გვაქვს ძალიან ძლიერი სახელმწიფოს ასაშენებლად. ამავე დროს, ჩვენ უნდა გვახსოვდეს, რომ ვართ ოკუპირებული ქვეყანა. ჩვენი ქვეყნის ორი რეგიონი, მოდით, აქ ემოციების გარეშე ვისაუბროთ, არის ოკუპირებული ბირთვული ძალის მქონე სახელმწიფოს ჯარების მიერ.”

პრეზიდენტმა აღნიშნა, რომ არცერთი ქართველი პოლიტიკოსი უარს არ იტყვის საქართველოს სუვერენიტეტსა და ტერიტორიულ მთლიანობაზე:

„ჩვენ ამაზე როგორც ერი, როგორც საზოგადოება, როგორც ის ადამიანები რომლებიც ერთმანეთს მიუხედავად იმისა, რომ ბევრ საკითხში ვლანძღავთ, ვეკამათებით, ბევრ საკითხში დაპირისპირებულები ვართ, ამაში ვართ შეთანხმებულები".

პრეზიდენტმა აღნიშნა, რომ ოკუპაციას რუსეთის მხრიდან არანაირი ადეკვატური არგუმენტი არ აქვს და სადემარკაციო ხაზის გავლების პროცესი ალოგიკურია, ვინაიდან დამატებით რამდენიმე სოფელი რუსეთის ფედერაციას არანაირ პოლიტიკურ, ან ეკონომიკურ მოგებას არ აძლევს, საპირისპიროდ იწვევს საერთაშორისო საზოგადოების მიერ რუსეთის ოკუპანტად აღქმას. გიორგი მარგველაშვილმა აღნიშნა, რომ ეს პროცესი უნდა გამოსწორდეს მოლაპარაკების გზით:

„საკითხი, რაზეც ჩვენ შეთანხმებულები ვართ, რომ ჩვენ ტერიტორიული მთლიანობის და სუვერენიტეტის აღდგენა გვინდა, გვჯერა და ამაზე ხელი მოგვიწერია არაერთხელ – არა სამხედრო ქმედებებით, არამედ პოლიტიკური, დიპლომატიური და შერიგების პროცესის შედეგად“.