აშშ-ის ელჩი საქართველოში რობინ დანიგანი "რადიო თავისუფლებასთან" ინტერვიუში აცხადებს, რომ ქართული ოცნების მიერ დონალდ ტრამპისადმი მიწერილი aწერილი იყო "მუქარის შემცველი, შეურაცხმყოფელი, არასერიოზული და უკიდურესად ცუდად იყო მიღებული ვაშინგტონში". ამას გარდა, მისი თქმით, მას პასუხი ჰქონდა აშშ-ს სახელმწიფო მდივან რუბიოსგან, რომელმაც სთხოვა, რომ ბიძინა ივანიშვილისთვის გადაეცა, მაგრამ ივანიშვილმა მასთან შეხვედრაზე უარი თქვა.

ნაწყვეტი ინტერვიუდან:

"რობინ დანიგანმა განაცხადა, რომ ის დონალდ ტრამპის ინაუგურაციის შემდეგ, ადმინისტრაციის პირველ დღეებში ვაშინგტონში გაემგზავრა, რათა შეხვედროდა ახალი ადმინისტრაციის მაღალჩინოსნებს:

"მე დავბრუნდი ამ შეხვედრებიდან და შევხვდი საგარეო საქმეთა მინისტრს [მაკა ბოჭორიშვილს] და ძალიან მკაფიოდ წარვუდგინე ორი თუ სამი ნაბიჯი, რომელთა გადადგმითაც "ქართული ოცნება" ხელს შეუწყობდა ურთიერთობების სწორ გზაზე დაბრუნებას", — ამბობს იგი.

"სამი დღის შემდეგ — და ხაზს ვუსვამ, ჩვეულებრივ ამაზე არ ვლაპარაკობ, მაგრამ პრემიერმინისტრმა თავად თქვა ამის შესახებ — ქართული ოცნების ხელმძღვანელობამ გამომიგზავნა წერილი ტრამპის ადმინისტრაციისთვის, პირადი წერილი.

ეს არ არის საჯარო წერილი, რომელიც, გულწრფელად გეტყვით, იყო მუქარის შემცველი, შეურაცხმყოფელი, არასერიოზული და უკიდურესად ცუდად იყო მიღებული ვაშინგტონში. უკიდურესად ცუდად", — აცხადებს ელჩი დანიგანი "რადიო თავისუფლებასთან" ინტერვიუში.

"ამასობაში, სანამ ჩვენ პასუხზე ვფიქრობდით, პრემიერმინისტრმა გამოაქვეყნა ღია წერილი. და მაშინ მე მივედი პრემიერმინისტრთან და ვუთხარი, რომ მაქვს პასუხი სახელმწიფო მდივან რუბიოსგან, რომელმაც მთხოვა, რომ ის ბიძინა ივანიშვილს გადავცე", — განაცხადა ელჩმა.

მისივე თქმით, მას უთხრეს, რომ "ტრამპის ადმინისტრაციის ეს წერილი გადაეცა პირადად ბიძინა ივანიშვილისთვის და მან თქვა უარი". "ჩემთვის არ უთხოვიათ, რომ ის პრემიერმინისტრისთვის მიმეცა", — აზუსტებს ელჩი.

შეგახსენებთ, რომ მიმდინარე წლის 13 მაისს, ოცნების პრემიერმინისტრმა, ირაკლი კობახიძემ აშშ-ს პრეზიდენტს, დონალდ ტრამპს და აშშ-ს ვიცე-პრეზიდენტს, ჯეი დი ვანსს ღია წერილით მიმართა. სადაც წერდა, რომ ტრამპის ადმინისტრაციას რამდენიმე კვირის წინ წერილით მიმართეს ქართულ-ამერიკულ ურთიერთობებთან დაკავშირებით. თუმცა, პასუხი არ მიუღიათ.

ღია წერილში ოცნების პრემიერი ამერიკის კონგრესის მიერ მიღებულ "MEGOBARI აქტზეც" წერდა და აღნიშნავდა, რომ "MEGOBARI აქტს" არაერთი სუბიექტი მათ ადმინისტრაციას მიაწერს. ტრამპის ადმინისტრაციას კი ამ დრომდე ამ ყველაფერზე "კრიტიკული განცხადება არ გაუკეთებია.

ამას გარდა, კობახიძე წერდა, რომ "USAID-ისა და NED-ის მიერ დატრენინგებული და დაფინანსებული 250-მდე ადამიანი დღემდე ყოველდღიურად იკრიბებოდა ცენტრალურ გამზირზე, რაც იმის მტკიცებულება იყო, რომ "დიფ სთეითს" რევოლუციის გეგმა თაროზე ჯერაც არ ჰქონდა შემოდებული" და იმედოვნებდა, რომ დონალდ ტრამპის დაპირება "დიფ სთეითთან" ბრძოლის შესახებ, გამარჯვებით დასრულდებოდა, "რაც საფუძვლად დაედებოდა ქართულ-ამერიკული ურთიერთობების გადატვირთვას და სტრატეგიული პარტნიორობის აღდგენას".

შეგახსენებთ, რომ საქართველოში აშშ-ს ელჩი რობინ დანიგანი ივლისში საქართველოს პირადი გადაწყვეტილების საფუძველზე ტოვებს.