საქართველოს ცენტრალური საარჩევნო კომისიის ინფორმაციით, ქ.ოზურგეთის #6 საუბნო საარჩევნო კომისიის შენობაში კარი შეამტვრიეს, ინვენტარი დააზიანეს და ამომრჩეველთა სიის საჯარო ვერსია ჩამოხიეს. უწყებაში აღნიშნავენ, რომ შემთხვევა გასულ ღამეს მოხდა და ადგილზე შესაბამისი სამართლებრივი პროცედურები მიმდინარეობს.

"ზემოაღნიშნული ინციდენტი არ იქონიებს ზეგავლენას საუბნო საარჩევნო კომისიის ყოველდღიურ საქმიანობაზე", - აღნიშნავენ ცესკოში.

მათივე ინფორმაციით, მსგავსი შემთხვევა ორი დღის წინ გარდაბნის #31 საუბნო საარჩევნო კომისიაშიც მოხდა.

"საარჩევნო ადმინისტრაციისთვის მიუღებელია ასეთი ძალადობრივი ქმედებები და იმედს იტოვებს, რომ აღნიშნული ინციდენტები წარმოადგენს იზოლირებულ, დაუგეგმავ ერთეულ შემთხვევებს და არ მიიღებს საარჩევნო პროცესის დამაზიანებელ სისტემურ ხასიათს", - აცხადებენ უწყებაში.