პაველ პავლიკოვსკიმ და დიტო ცინცაძემ სინდისის პატიმარს, ანდრო ჭიჭინაძეს წერილი გაუგზავნეს და სოლიდარობა გამოუცხადეს. ამის შესახებ ინფორმაციას ნინო ბოლქვაძე საკუთარ სოციალურ ქსელში ავრცელებს.

"ამჟამად თბილისის საქალაქო სასამართლოში ანდრო ჭიჭინაძის პროცესი მიმდინარეობს. მოულოდნელად მიღებული ახალი კანონის გამო, მიუხედავად საზოგადოების მხრიდან მაღალი ინტერესისა, ანდროს და დანარჩენი სინდისის პატიმრების საქმის გასაჯაროება მოულოდნელად შეუძლებელი გახდა. სანამ ანდრო ხმას ვერ აწვდენს ფართო საზოგადოებას მის უდანაშაულობასთან დაკავშირებით, ამასობაში მივიღე ანდრო ჭიჭინაძისთვის სოლიდარობის წერილი ოსკაროსანი და კანის კინოფესტივალის ოქროს პალმის რტოს მფლობელი რეჟისორისგან ბატონი პაველ პავლიკოვსკისგან და ცნობილი ქართველი რეჟისორისგან ბატონი დიტო ცინცაძისგან. ბატონი პაველ პავლიკოვსკი და ბატონი დიტო ცინცაძე წერილში სოლიდარობას უცხადებენ ანდრო ჭიჭინაძეს, ხელოვნება და დემოკრატია არის განუყოფელი და ანდრო ჭიჭინაძემ, ახალგაზრდა ნიჭიერმა მსახიობმა გაწირა მისი კეთილდღეობა თავისი სამშობლოსთვის და ის ნამდვილი წინააღმდეგობის სიმბოლოა თავისი სამშობლოს თავისუფლებისთვის ბრძოლაში! თავისუფლება ანდროს!"— დაწერა ნინო ბოლქვაძემ საკუთარ სოციალურ ქსელში.

ცნობისთვის, მსახიობი ანდრო ჭიჭინაძე 5 დეკემბერს დააკავეს და ბრალი სისხლის სამართლის კოდექსის 25-ე მუხლის მე-2 ნაწილით გათვალისწინებული დანაშაულის ჩადენისთვის წაუყენეს, რაც ჯგუფურ ძალადობაში მონაწილეობას გულისხმობს და სანქციის სახით 4-დან 6 წლამდე პატიმრობას განსაზღვრავს.

ჭიჭინაძის საქმე განიხილება ანალოგიური ბრალით დაკავებულ კიდევ 10 მოქალაქესთან ერთად, რომლებსაც ანდრო ჭიჭინაძე დაკავებამდე არ იცნობდა.

ასევე იხილეთ: