ირანმა კატარში მდებარე ალ-უდეიდის ავიაბაზაზე "ძალიან ძლიერი და დამანგრეველი სარაკეტო შეტევა" განახორციელა, როგორც პასუხი აშშ-ის მიერ მისი ბირთვული ობიექტების დაბომბვაზე — ამის შესახებ ნათქვამია ირანის ისლამური რევოლუციური გვარდიის მიერ გავრცელებულ განცხადებაში.

კატარის თავდაცვის სამინისტრო აცხადებს, რომ ირანული სარაკეტო თავდასხმა აღკვეთილია – დაღუპულები და დაშავებულები არ არიან.

კატარის თავდაცვის სამინისტროს განცხადებით, ქვეყნის საჰაერო თავდაცვამ წარმატებით აღკვეთა სარაკეტო თავდასხმა, რომელიც ალ-უდეიდის ავიაბაზისკენ იყო მიმართული. სამინისტროს თქმით, თავდასხმას არ მოჰყოლია არც მსხვერპლი და არც დაშავებულები.

კატარმა დაგმო ირანის თავდასხმა აშშ-ის ალ-უდეიდის ავიაბაზაზე და "კატარის სუვერენიტეტისა და საჰაერო სივრცის თვალსაჩინო დარღვევად" მოიხსენია.

"ვადასტურებთ, რომ კატარის სახელმწიფოს აქვს უფლება პირდაპირი და პროპორციული პასუხის გაცემაზე ამ აშკარა აგრესიის ბუნებისა და მასშტაბის შესაბამისად და საერთაშორისო სამართლის ფარგლებში", — ნათქვამია კატარის საგარეო საქმეთა სამინისტროს წარმომადგენლის, მაჯედ ალ-ანსარის განცხადებაში.

"დარწმუნებით ვაცხადებთ, რომ კატარის საჰაერო თავდაცვამ მოიგერია თავდასხმა და წარმატებით ჩაჭრა ირანული რაკეტები. თავდასხმის დეტალების შესახებ დამატებით განმარტებას მოგვიანებით გამოაქვეყნებს თავდაცვის სამინისტრო", — აღნიშნა ალ-ანსარიმ.

აშშ-ის თავდაცვის უწყების წარმომადგენლის თქმით, კატარში მდებარე ალ-უდეიდის ავიაბაზაზე განხორციელდა იერიში ირანის ტერიტორიიდან გაშვებული მოკლე და საშუალო მანძილის ბალისტიკური რაკეტებით.

"ამ დროისთვის არ გვაქვს ინფორმაცია ამერიკელი სამხედროების დაშავების ან დაღუპვის შესახებ", — განაცხადა ოფიციალურმა პირმა — "ვაკვირდებით ვითარებას და დამატებით ინფორმაციას მივაწვდით საზოგადოებას როგორც კი ხელმისაწვდომი გახდება".

ასევე, თეთრი სახლის მაღალჩინოსანმა CNN-ს განუცხადა, რომ ტრამპის ადმინისტრაცია ელოდა თეირანის საპასუხო მოქმედებას მას შემდეგ, რაც შაბათ-კვირას აშშ-მა ირანის ბირთვულ ობიექტებზე იერიში მიიტანა.

ერთ-ერთ ინფორმირებულ წყაროზე დაყრდნობით, CNN ავრცელებს ინფორმაციას, რომ ირანელმა ოფიციალურმა პირებმა წინასწარ აცნობეს კატარს, აშშ-ის სამხედრო ბაზებისკენ რაკეტების გაშვების შესახებ.

წყაროს თქმით, ეს კოორდინაცია მიზნად ისახავდა დაზიანებების მინიმიზაციას და დეესკალაციის შესაძლებლობის შენარჩუნებას.