დღეს გამართულ სასამართლო პროცესზე მზია ამაღლობელის ადვოკატმა, მაია მწარიაშვილმა მისი დაცვის ქვეშ მყოფის ჯანმრთელობის მდგომარეობაზე კომენტარი გააკეთა. მისი თქმით, მზია ამაღლობელის ჯანმრთელობის მდგომარეობა ციხეში ყოფნის პერიოდში გაუარესებულია.

ადვოკატმა ყურადღება მხედველობაზე გაამახვილა.

"4 თებერვლის ანალიზის დოკუმენტის თანახმად, მზია ამაღლობელს მარჯვენა თვალში მხედველობა აქვს 30%, მარცხენა თვალში მხედველობა აქვს 0.04%.

6 თებერვალს ჩატარებული კვლევით მარჯვენა თვალზე მხედველობა 10%-ზე ჩამოვიდა. სათვალის გამოყენებით ეს შეიძლება გაიზარდოს მხოლოდ 40%-მდე, როცა დაკავებამდე სათვალით შეეძლო 90%-მდე გაეზარდა მარჯვენა თვალში მხედველობა.

მარცხენა თვალში 0.04%, შესაბამისად, მარცხენა თვალში გარჩევადობა მხოლოდ სინათლე-სიბნელის გარჩევის დონეზეა. ძალიან დაბალი მხედველობა აქვს მეორე თვალში, რამაც კიდევ უფრო დაიკლო," ― თქვა ადვოკატმა.

მზია ამაღლობელის მხედველობასთან დაკავშირებით "მთის ამბების" რედაქტორმა და ჟურნალისტმა გელა მთივლიშვილმა საკუთარ სოციალურ ქსელში დაწერა.

ცნობისთვის, "სტიკერის საქმეზე" ჟურნალისტი მზია ამაღლობელი ბათუმის საქალაქო სასამართლოში უკვე ორჯერ გაასამართლეს ― პირველად 2000 ლარით დააჯარიმეს, ხოლო მეორედ 1000 ლარით.