პრესის საერთაშორისო ინსტიტუტის (IPI) განცხადებაში ვკითხულობთ, რომ 28 ნოემბრის შემდეგ, სულ მცირე 13 ჟურნალისტი იყო დაკავებული, ხოლო 246-ზე მეტმა ჟურნალისტმა გადაიტანა ფიზიკური შევიწროება, სამართლებრივი დევნა და დაჯარიმება.

განცხადებაში ასევე საუბარია Mapping Media Freedom-ის მონაცემებზე — 28 ჟურნალისტს დაეკისრა 5,000 ლარის ჯარიმა პროევროპული აქციების გაშუქებისას გზის გადაკეტვის ბრალდებით. ზოგიერთ ჟურნალისტს ჯარიმა არაერთხელ დაეკისრა.

განცხადების ბოლოს ვკითხულობთ, რომ IPI მოუწოდებს ქართულ ოცნებას დაუყოვნებლივ შეწყვიტოს მედიის დევნა, გააუქმოს რეპრესიული კანონმდებლობა და მზია ამაღლობელი დაუყოვნებლივ გაათავისუფლოს.

"როგორც მმართველი პარტია ქართული ოცნება აძლიერებს ავტორიტარული მმართველობის კონსოლიდაციის მცდელობებს, დამოუკიდებელი მედია უპრეცედენტო ზეწოლის წინაშე დგას და ფაქტობრივად გადარჩენისთვის იბრძვის. ჟურნალისტები გახდნენ დაკავებების, ფიზიკური ძალადობის, თვითნებური დაჯარიმების, ცენზურის, ასევე ფინანსური და ინსტიტუციური რეპრესიების სამიზნე.

საერთაშორისო პრესის ინსტიტუტი (IPI) სხვა მედიის თავისუფლების, ჟურნალისტებისა და ადამიანის უფლებების ორგანიზაციებთან ერთად კიდევ ერთხელ მოვუწოდებთ საერთაშორისო საზოგადოებას, განსაკუთრებით კი ევროპულ კავშირს, მოახდინოს ეფექტიანი ზეწოლა მმართველ პარტია ქართულ ოცნებაზე, რათა დასრულდეს დამოუკიდებელი ჟურნალისტიკის ჩახშობა და იქნეს დაცული დემოკრატიული პრინციპები და მედიის თავისუფლება. ასევე, სრულ სოლიდარობას ვუცხადებთ ქართველ ჟურნალისტებს, რომლებიც მიუხედავად მზარდი ზეწოლისა, კვლავაც არ ჩერდებიან.

ბოლო თვეებში, ქართულმა ოცნებამ მიიღო არაერთი რეპრესიული კანონმდებლობა, მათ შორის — კანონი "უცხოური აგენტების შესახებ", ასევე ცვლილებები გრანტებისა და მაუწყებლობის შესახებ კანონებში.

ამ კანონების თანახმად, მედიისა და არასამთავრობო ორგანიზაციების ხელმძღვანელებს ემუქრებათ სისხლისსამართლებრივი დევნა, თუკი სახელმწიფო გადაწყვეტს, რომ მათ "უცხო ქვეყნის ინტერესით" იმოქმედეს და განზრახ არ დარეგისტრირდნენ. ამასთან, უცხოური გრანტის მიღებამდე, მედიასა და NGO-ებს სავალდებულო ხდება მთავრობის ან მისი მიერ დანიშნული პირის თანხმობის მიღება. კანონის დარღვევად შეიძლება ჩაითვალოს ისეთიც კი, როგორიც არის ჟურნალისტებისთვის საერთაშორისო ორგანიზაციების მიერ შეთავაზებული უფასო ტრენინგები.

მძიმე საფრთხე ემუქრება დამოუკიდებელი მედიის არსებობას საქართველოში – შესაძლოა, ისინი რამდენიმე თვეში იძულებულნი გახდნენ დაიხურონ, რაც საზოგადოებას თავისუფალი და დამოუკიდებელი ინფორმაციის მიღების შესაძლებლობას წაართმევს.

ბოლო თვეებში, საპროტესტო აქციების გაშუქებისას ჟურნალისტები ხშირად დაჯარიმდნენ. Mapping Media Freedom-ის მონაცემებით, 28 ჟურნალისტს დაეკისრა 5,000 ლარის (დაახლოებით 1,600 ევრო) ჯარიმა იმისთვის, რომ მათ "გზა გადაკეტეს" პროევროპული აქციების გაშუქებისას თბილისში. ზოგიერთ ჟურნალისტს ჯარიმა არაერთხელ დაეკისრა.

საქართველოს საზოგადოებრივი მაუწყებელი (GPB) უკვე დიდი ხანია პოლიტიკური ზეწოლის იარაღად იქცა ქართული ოცნების ხელში და დაბრკოლებას უქმნის ჟურნალისტებს, რომლებიც პოლიტიკურად დამოუკიდებელი გაშუქების მცდელობას ახორციელებენ. ცოტა ხნის წინ, საზოგადოებრივი მაუწყებლის მენეჯმენტმა გაათავისუფლა ჟურნალისტები ვასილ ივანოვ ჩიქოვანი და ნინო ზაუტაშვილი, მას შემდეგ, რაც მათ მაუწყებელში პოლიტიკური ზეგავლენა საჯაროდ გააპროტესტეს. მოგვიანებით ზაუტაშვილის საავტორო გადაცემა "რეალური სივრცე" დახურეს.

ამავე დროს დამოუკიდებელი მედია ორგანიზაციების — ნეტგაზეთისა და ბათუმელების დამფუძნებელი და დირექტორი მზია ამაღლობელი, რომელიც იანვარში დააკავეს, დღემდე უსამართლოდ იმყოფება წინასწარ პატიმრობაში. Mapping Media Freedom-ის თანახმად, 28 ნოემბრის შემდეგ, სულ მცირე 13 ჟურნალისტია დაკავებული სხვადასხვა ბრალდებით, ხოლო 246-ზე მეტმა ჟურნალისტმა გადაიტანა ფიზიკური შევიწროება, დისკრედიტაციის კამპანიები, პროფესიული საქმიანობის ხელშეშლა, სამართლებრივი დევნა და დაჯარიმება.

მედიის თავისუფლების წინააღმდეგ ეს მასშტაბური შეტევა მიმდინარეობს სამართლის უზენაესობისა და დემოკრატიული თავისუფლებების მიზანმიმართული დემონტაჟის ფონზე.

საერთაშორისო ზეწოლის გარეშე — როგორც მმართველი პარტიის, ისე იმ ინსტიტუციების ხელმძღვანელებზე, რომლებიც მედიის წინააღმდეგ დევნის პროცესში მონაწილეობენ — დამოუკიდებელი ჟურნალისტიკა საქართველოში ვერ გადარჩება.

მედიისა და დემოკრატიული ღირებულებების დემონტაჟი, ჟურნალისტების უფლებების დარღვევა და საქართველოს გეოპოლიტიკური კურსის ცვლილება გავლენას ახდენს არა მხოლოდ ქვეყნის შიგნით, არამედ მთელი რეგიონის დემოკრატიულ მომავალზე.

მოვუწოდებთ საერთაშორისო საზოგადოებას, მოახდინოს ეფექტიანი ზეწოლა ქართულ ხელისუფლებაზე და მხარი დაუჭიროს დამოუკიდებელ მედიას. მოვუწოდებთ მმართველ პარტიას — დაუყოვნებლივ შეწყვიტოს მედიის დევნა, გააუქმოს რეპრესიული კანონმდებლობა და დაუყოვნებლივ გაათავისუფლოს მზია ამაღლობელი," — ვკითხულობთ განცხადებაში.