გენერალური პროკურორმა გიორგი გაბიტაშვილმა პროფესიულ დღესთან დაკავშირებით, პროკურატურის 136 თანამშრომელი, მათ შორის პროევროპულ აქციებზე დაკავებული მოქალაქეების საქმეების პროკურორები დააჯილდოვა.

სამსახურებრივი მოვალეობის სანიმუშოდ შესრულებისთვის მადლობა გამოეცხადა პროკურატურის 118 თანამშრომელს; სახელმწიფო სპეციალური წოდება ვადამდე მიენიჭა 15-ს; პროკურატურის საპატიო თანამშრომლის წოდება — 3 თანამშრომელს.

პროკურატურის თანამშრომლებს შორის არიან პროევროპულ აქციებზე დაკავებულთა საქმეების პროკურორები, რომელთა ნაწილი სანქცირებულია ევროპის ქვეყნების მიერ.

ნეტგაზეთის ცნობით, გაბიტაშვილის მიერ დაჯილდოებულ პროკურორებს შორისაა:

ანი ხუბეჯიშვილი — მათე დევიძის, დავით ლომიძის, თეიმურაზ ზასოხაშვილის და არჩილ მუსელიანცის პროკურორი;

ვაჟა თოდუა — დავით ხომერიკის, 8 და 11-პირიანი საქმეების პროკურორი;

თამარ იაკობიძე — ანატოლი გიგაურის, დანიელ მუმლაძის გურამ ხუტაშვილისა და საბა ჯიქიას საქმეების პროკურორი;

თორნიკე გოგეშვილი — მზია ამაღლობელის საქმის პროკურორი;

ნუგზარ ჭიტაძე — ნიკა კაციას, ანტონ ჩეჩინის, თედო აბრამოვის, ანასტასია ზინოვკინას და არტემ გრიბულის საქმეების პროკურორი;

შმაგი გობეჯიშვილი — გიორგი ახობაძის საქმის პროკურორი;

ვახტანგ ცალუღელაშვილი — 8 და 11-პირიანი საქმეების პროკურორი.

გაბიტაშვილის თქმით, მათი "ყოველდღიური შრომა, პროფესიონალიზმი, სიმტკიცე და პრინციპულობა უზრუნველყოფს, რომ "სამართალი" იყოს არა ლიტონი სიტყვა, არამედ უმაღლესი ღირებულება, რომელიც იცავს თითოეული მოქალაქის უფლებებს".

"გენერალური პროკურორის მუდმივმოქმედი სათათბირო ორგანოს — კარიერის მართვის, ეთიკისა და წახალისების საბჭოს რეკომენდაციის საფუძველზე, სამსახურებრივი მოვალეობის სანიმუშოდ შესრულებისთვის მადლობა გამოეცხადა პროკურატურის 118 თანამშრომელს, სახელმწიფო სპეციალური წოდება ვადამდე მიენიჭა15 თანამშრომელს. ასევე პროკურატურის საპატიო თანამშრომლის წოდება მიენიჭა 3 თანამშრომელს და დაჯილდოვდნენ შესაბამისი სამკერდე ნიშნით: რევაზ ბაღაშვილი — საქართველოს გენერალური პროკურატურის საგამოძიებო ნაწილის უფროსი, ზაზა მეტონიძე — აჭარის ავტონომიური რესპუბლიკის პროკურორი, იამზე ვაშალომიძე — ქვემო ქართლის საოლქო პროკურატურის საქმისწარმოების განყოფილების უფროსი", — ნათქვამია გავრცელებულ ინფორმაციაში.