საქართველოს მესამე პრეზიდენტმა და ოდესის ყოფილმა გუბერნატორმა მიხელ სააკაშვილმა კიევში, პრეზიდენტის ადმინისტრაციასთან, აქცია გამართა. როგორც Ukrayinska Pravda წერს, სააკაშვილი ადმინისტრაციისგან უკრაინის მოქალაქეობის ჩამორთმევის შესახებ საბუთების მიღებას მოითხოვს:

"მათ ხელი მოაწერეს განკარგულებას, მაგრამ არც ერთი საბუთი არ მოუციათ, რითაც მე სასამართლოში მისვლა შემიძლია."

სააკაშვილის თქმით, ამ მოთხოვნით პრეზიდენტის ადმინისტრაციას მისი ადვოკატები მიმართავენ. ყოფილი გუბერნატორის თქმით, მას უკრაინის პრეზიდენტ პეტრო პოროშენკოსთან კონფლიქტი არ აქვს:

"მას აქვს ჩემთან კონფლიქტი. წარმატებას ვუსურვებ ამერიკაში. იქ უკვე ვიყავი."

აქციაზე მან, ასევე, განაცხადა, რომ ღამით კიევს დატოვებს და ჩერკასეში გაემგზავრება და უკრაინაში ხალხთან შეხვედრას გააგრძელებს.

ექს-პრეზიდენტსა და ოდესის ყოფილ გუბერნატორს, მიხეილ სააკაშვილს უკრაინის მოქალაქეობა პრეზიდენტ პოროშენკოს გადაწყვეტილებით 26 ივლისს, ამერიკაში ვიზიტისას ჩამოერთვა.

10 სექტემბერს სამართალდამცავების წინააღმდეგობის მიუხედავად უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს და სააკაშვილი უკრაინის ტერიტორიაზე გადაიყვანეს. ამ ფაქტთან დაკავშირებით უკრაინაში გამოძიება უკვე მიმდინარეობს. 13 სექტემბერს სააკაშვილმა უკრაინის ქალაქებში ხალხთან შეხვედრები დაიწყო.