გერმანია მზადაა უკრაინას Taurus-ის რაკეტები გადასცეს, რათა დაეხმაროს კიევს რუსეთის წინააღმდეგ ბრძოლაში. ამის შესახებ გერმანიის მომავალმა კანცლერმა ფრიდრიხ მერცმა განაცხადა.

კვირას ARD-ის კორესპონდენტ კარენ მიოსგასთან საუბრისას მერცმა თქვა, რომ კვლავ თანახმაა უკრაინის სამხედროებისთვის შორი მოქმედების იარაღის მიწოდებაზე.

ცნობისათვის, ეს წინადადება ეწინააღმდეგება გერმანიის მოქმედი ლიდერის ოლაფ შოლცის პოლიტიკას, რომელმაც უარი თქვა უკრაინისთვის რაკეტების მიწოდებაზე.

მერცის კომენტარები რუსეთის უკრაინაზე სარაკეტო თავდასხმის შემდეგ გაკეთდა. რასაც მან "სერიოზული ომის დანაშაული" უწოდა. სამხედრო იერიშის შედეგადაც უკრაინის ქალაქ სუმიში სულ მცირე 34 მშვიდობიანი მოქალაქე დაიღუპა და 117 დაიჭრა.

გერმანიის პარლამენტი 6 მაისს შეიკრიბება და ქვეყნის კანცლერად ფრიდრიხ მერცს აირჩევს, მერცს გერმანიის მეათე კანცლერად არჩევისთვის ბუნდესტაგის ყველა წევრის უმრავლესობა დასჭირდება.