ირანისა და საქართველოს მოქალაქეები, საზღვრის უკანონო გადაკვეთის მცდელობისა და ყალბი დოკუმენტების დამზადების ბრალდებით, თბილისის საერთაშორისო აეროპორტში დააკავეს.

შინაგან საქმეთა სამინიტროს მტკიცებით, დაკავებულმა ირანის მოქალაქემ სლოვენიის მოქალაქის ყალბი პასპორტის და ჩასხდომის ბარათში ყალბი თარიღ-დამღის გამოყენებით, თავის მცირეწლოვან შვილთან ერთად, თბილისის საერთაშორისო აეროპორტში, თვითმფრინავში უკანონოდ შეაღწია. შსს-ს ცნობით, მას საქართველოს მოქალაქე დაეხმარა და ჩასხდომის ბარათში ყალბი თარიღ-დამღა დაუსვა.

საპატრულო პოლიციის თანამშრომლებმა, მოსამართლის განჩინების საფუძველზე, საქართველოს მოქალაქის საცხოვრებელი სახლი გაჩხრიკეს, რის შედეგადაც სხვადასხვა სავარაუდოდ ყალბი დოკუმენტები ამოიღეს.

ირანის მოქალაქის მიმართ გამოძიება ყალბი საბუთების გამოყენებით საქართველოს სახელმწიფო საზღვარზე მიგრანტის უკანონოდ გადაყვანის მცდელობის, საქართველოს სახელმწიფო საზღვრის უკანონოდ გადაკვეთის მცდელობის, ყალბი პირადობის მოწმობის ან სხვა ოფიციალური დოკუმენტის, შეძენა-შენახვა-გამოყენება მუხლებით მიმდინარეობს.

რაც შეეხება საქართველოს მოქალაქეს, მის მიმართ საქმე ყალბი საბუთების გამოყენებით საქართველოს სახელმწიფო საზღვარზე მიგრანტის უკანონოდ გადაყვანის მცდელობაში დახმარების, საქართველოს სახელმწიფო საზღვრის უკანონოდ გადაკვეთის მცდელობაში დახმარების, ყალბი პირადობის მოწმობის ან სხვა ოფიციალური დოკუმენტის დამზადება და გასაღების მუხლებითაა აღძრული.