გაეროს ტურიზმის მსოფლიო ორგანიზაციის (UNWTO) გენერალურ მდივნად ზურაბ პოლოლიკაშვილი დაამტკიცეს. ამის შესახებ ინფორმაციას საგარეო საქმეთა სამინისტრო ავრცელებს და აღნიშნავენ, რომ ის ერთხმად აირჩიეს.

"აღსანიშნავია რომ ეს არის პირველი შემთხვევა, როდესაც საქართველოს კანდიდატი საერთაშორისო ორგანიზაციის მაღალი ხელმძღვანელის პოზიციას დაიკავებს", - განმარტავენ საგარეო საქმეთა სამინისტროში.

პოლოლიკაშვილი UNWTO-ს გენერალური ასამბლეის 22-ე სესიის ფარგლებში ჩინეთში აირჩიეს. ის ამ თანამდებობაზე 2018-2021 წლების ვადით იმუშავებს.

გაერო-ს ტურიზმის მსოფლიო ორგანიზაციის (UNWTO) გენერალური მდივნის თანამდებობაზე ზურაბ პოლოლიკაშვილი საქართველოს პრემიერ-მინისტრმა, გიორგი კვირიკაშვილმა 14 ნოემბერს წარადგინა.

"იგი ასრულებდა წამყვან როლს საქართველოს ტურისტული პოტენციალის სრულად ამოქმედებაში და ტურიზმის სექტორში უცხოური ინვესტიციებისა და ინოვაციების მოზიდვასა და ინოვაციების წახალისებაში"., - ასე დაახასიათა კვირიკაშვილმა პოლოლიკაშვილის წარდგენისას.

პოლოლიკაშვილი 2009 წლის 26 აგვისტოს დაინიშნა საქართველოს ეკონომიკური განვითარების მინისტრად. იგი 2006-2009 წლებში, მინისტრად დანიშვნამდე იყო საქართველოს საგანგებო და სრულუფლებიანი ელჩი ესპანეთში. მანამდე, 2005-2006 წლიდან მუშაობა განაგრძო საქართველოს საგარეო საქმეთა სამინისტროში, მინისტრის მოადგილედ ხოლო 2006 წელს დაინიშნა ესპანეთის სამეფოში საგანგებო და სრულუფლებიან ელჩად.