Der Spiegel-ის ჟურნალისტებმა ტრამპის გუნდის მაღალჩინოსნების, მათ შორის — ტრამპის მრჩევლის ეროვნული უსაფრთხოების საკითხებში მაიკ უოლცის, აშშ-ს თავდაცვის მდივან პიტ ჰეგსეთისა და ეროვნული დაზვერვის დირექტორ ტულსი გაბარდის პერსონალური მონაცემები — მობილური ტელეფონის ნომრები, ელექტრონული ფოსტის მისამართები და პაროლები საჯარო დომენში იპოვეს. ამის შესახებ Der Spiegel წერს.

გამოცემა წერს, რომ ყველა მათგანი მონაწილეობდა Signal-ის იმ საიდუმლო ჩათთან დაკავშირებულ სკანდალში, რომელსაც შეცდომით დაემატა ჟურნალ The Atlantic-ის მთავარი რედაქტორი ჯეფრი გოლდბერგი.

გაჟონილ მონაცემთა ბაზებში ჟურნალისტებმა შეძლეს მოეძებნათ მობილური ტელეფონის ნომრები და ელექტრონული ფოსტის მისამართები, მათ შორის ისეთები, რომლებიც დაკავშირებულია Instagram-ის, LinkedIn-ის, Dropbox-ისა და Signal-ის ანგარიშებთან. როგორც Der Spiegel წერს, ზოგიერთ შემთხვევაში პაროლებიც კი საჯარო იყო.

გამოცემა წერს, რომ ინფორმაცია, რომელიც ჟურნალისტებმა აღმოაჩინეს, შეიძლება ჰაკერებმა და არამეგობრული ქვეყნების დაზვერვის სამსახურებმა გამოიყენონ.

Atlantic-ის მთავარმა რედაქტორმა ჯეფრი გოლდბერგმა 14 მარტს განაცხადა, რომ მან მიიღო წვდომა ფარულ ჩათზე, რომელშიც ტრამპის ადმინისტრაციის მაღალჩინოსნები განიხილავდნენ იემენის ჰუთებზე თავდასხმებს. ჩათის მონაწილეები იყვნენ ვიცე-პრეზიდენტი ჯ.დ. ვენსი და თავდაცვის მინისტრი პიტ ჰეგსეთი.

ინფორმაციის გაჟონვაზე პასუხისმგებლობა ეროვნული უსაფრთხოების მრჩეველმა მაიკ უოლცმა აიღო და განაცხადა, რომ მან შექმნა ჩათი. მოწვევა გოლდბერგს უოლცის სახელით გაეგზავნა, თუმცა ეროვნული უსაფრთხოების მრჩევლის თქმით, ჟურნალისტი მონაწილეთა სიაში სხვა სახელით იყო.

ტრამპმა თქვა, რომ ის არ გაათავისუფლებს უოლცს და ხაზგასმით აღნიშნა, რომ ჟურნალისტის ყოფნა ფარულ ჩატში გავლენას არ მოახდენს ჰუთების წინააღმდეგ ოპერაციაზე.