დაყადაღებული ფონდ ფროსფერითი ჯორჯიას დამფუძნებელი ნიკა გილაური პროკურატურის გადაწყვეტილებას ფონდების დაყადაღების შესახებ ფეისბუქ-პოსტში ეხმაურება.

გილაურის განცხადებით, დაზარალებულთა მხარდაჭერა დანაშაული არ არის და ფონდები ბიზნესისა და მოქალაქეების შემოწირულებებით ეხმარებიან პოლიტიკური რეპრესიების მსხვერპლებს, უსამართლოდ დაჯარიმებულ და ნაცემ ადამიანებს, ფარავენ მათი მკურნალობისა და წამლის ხარჯებს, თანადგომას უწევენ დაპატიმრებულთა ოჯახებს.

"ფონდების ანგარიშების დაყადაღება სისხლის სამართლის საქმის საფუძველზე არის სრული ფარსი.

დაზარალებულთა მხარდაჭერა დანაშაული არ არის — ეს არის მოვალეობა ყველა იმ ადამიანის, ვისაც სჯერა ქვეყნის გადარჩენის და მისი ევროპული მომავლის.
ეს ფონდები ბიზნესისა და მოქალაქეების შემოწირულებებით ეხმარებიან პოლიტიკური რეპრესიების მსხვერპლებს, უსამართლოდ დაჯარიმებულ და ნაცემ ადამიანებს, ფარავენ მათი მკურნალობისა და წამლის ხარჯებს, თანადგომას უწევენ დაპატიმრებულთა ოჯახებს.
როდესაც სიკეთის კეთებას აიგივებ დანაშაულთან, როდესაც დახმარების ხელის გაწვდენას გაჭირვებულისთვის ასაღებ ქვეყნის მტრობად - საზოგადოების ერთიანობა და ერთმანეთის გვერდში დგომა ხდება უფრო და უფრო ძლიერი!

საქართველოში სიკეთის კეთება, გასაჭირში მყოფთა გვერდში დგომა, უსამართლოდ დაჩაგრულთა დახმარება ვერ აიკრძალება!," — წერს გილაური.


შეგახსენებთ, 5 ფონდს, რომლებიც აქციებზე დაჯარიმებულ, დაკავებულ პირებს ეხმარებოდნენ, ასევე ფინანსურად ეხმარებოდნენ დაკავებულთა ოჯახებსაც, ანგარიშები დაუყადაღეს. ამ ფონდებს შორისაა ნანუკას ფონდი და ფროსფერითი ჯორჯიაც.

პროკურატურის განცხადებაში ვკითხულობთ, რომ აღნიშნული ფონდები დამამძიმებელ გარემოებაში საბოტაჟის მცდელობის, უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზებისთვის დააყადაღეს. პროკურატურა პროევროპულ აქციებზე წერს, რომ ისინი "ძალადობრივი ხასიათსაა და გასცდა კანონით დადგენილ ფარგლებს".

სოლიდარობის ფონდები და არასამთავრობო ორგანიზაციები, რომლებიც პროევროპულ აქციებზე დაკავებულთა ჯარიმებს იხდიდნენ და ქველმოქმედებას ეწეოდნენ, მათ შორის გურიასა და იმერეთში დაზარალებულებს ეხმარებოდნენ, საზოგადოებრივი მოძრაობა ერთიანი ნეიტრალური საქართველოს წარმომადგენლის, ვატო შაქარიშვილის შეტანილი სარჩელის საფუძველზე დააყადაღეს.

ჟურნალისტის კითხვაზე შაქარაშვილმა იცოდა თუ არა რას საქმიანობდნენ ეს ფონდები, ვატო შაქარაშვილმა განაცხადა, რომ ეს ფონდები ეხმარებოდნენ არ ეხმარებოდნენ გაჭირვებულ ადამიანებს.