შინაგან საქმეთა სამინისტროს საპატრულო პოლიციის დეპარტამენტი, 849 500 ლარის ღირებულების 350 ცალ სამკერდე კამერას და 200 კამერის პროგრამულ ლიცენზიას ტენდერის გარეშე შეიძენს. საპატრულო დეპარტამენტი ამ შენაძენს ბოლო პერიოდში პატრულ-ინსპექტორთა გაზრდილი რაოდენობითა და დაზიანებული კამერების ჩანაცვლებით განმარტავს.

"საპატრულო პოლიციის დეპარტამენტში პატრულ-ინსპექტორთა გაზრდილი პირადი შემადგენლობის აღჭურვისა და დაზიანებული კამერების ჩასანაცვლებლად, გვესაჭიროება ოფიცრის სამკერდე კამერების დამატებითი რაოდენობის შეძენა.

გამომდინარე იქიდან, რომ საპატრულო პოლიციის მიერ 2018 წლიდან გამოიყენება და დღეის მდგომარეობით გვაქვს 2 907 ერთეული კომპანია AXON-ის წარმოებული BODY 2 მოდელის სამკერდე კამერა, ამავე კომპანიის წარმოებული შესაბამისი ინფრასტრუქტურა, ლიცენზია და პროგრამული უზრუნველყოფა, შეუძლებელია ამ სისტემაში სხვა წარმოების კამერების ჩართვა, შესაბამისად არ არსებობს მიზანშეწონილი ალტერნატივა შესყიდვის ობიექტის ჩასანაცვლებლად", — წერს საპატრულო პოლიციის დეპარტამენტი შესყიდვების სააგენტოს.

დეპარტამენტის განცხადებაში ვკითხულობთ, რომ საპატრულო პოლიცია, თბილისსა და სხვა ქალაქებში მიმდინარე პროევროპული საპროტესტო აქციების გამო, საზოგადოებრივი წესრიგის დაცვის მიზნით, მუშაობის განსაკუთრებულ რეჟიმზეა გადასული.

"მიმდინარე საპროტესტო აქციებიდან გამომდინარე, საზოგადოებრივი წესრიგის დაცვის, ასევე საპროტესტო აქციების მშვიდობიან რეჟიმში ჩატარების უზრუნველყოფის, სამოქალაქო სიმშვიდის შენარჩუნებისა და საზოგადოებრივი წესრიგის დაცვის მიზნით, საპატრულო პოლიციის ეკიპაჟებს უხდებათ განსაკუთრებულ სამუშაო რეჟიმზე გადასვლა…" — აღნიშნულია დეპარტამენტის ერთ-ერთ განაცხადში.

საპატრულო პოლიციის დეპარტამენტი ასევე აცხადებს, რომ "პატრულ-ინსპექტორები, მათზე დაკისრებული სამსახურებრივი მოვალეობების შესრულების პროცესის სწორად წარმართვისათვის, კერძოდ სხვადასხვა მართლსაწინააღმდეგო ფაქტის დაფიქსირებისა და შესაბამისი სამსახურების წარდგენის, მტკიცებულებად გამოყენების მიზნით, აღჭურვილნი არიან ოფიცრის სამკერდე კამერებით".

ცნობისთვის, რუსული კანონის საწინააღმდეგო და პროევროპულ აქციებზე დაკავებული პირების საქმეებში ხშირად მოწმე პოლიციელების სამხრე კამერების ჩანაწერები არ არის წარმოდგენილი და ბრალდებულის გასამართლება ამ მტკიცებულების გარეშე ხდება.