აშშ-კანადას შორის მიმდინარე სავაჭრო ომი კიდევ უფრო მწვავდება მას შემდეგ, რაც კანადის ონტარიოს პროვინციამ აშშ-ს ელექტროენერგიის ექსპორტზე 25%-იანი ტარიფი დაუწესა, რაც აშშ-ის რამდენიმე შტატის მოსახლეობას ელექტროენერგიის გადასახადს საგრძნობლად გაუზრდის.

ამ ნაბიჯის საპასუხოდ, დონალდ ტრამპმა კანადიდან შემომავალ ალუმინსა და ფოლადზე ტარიფი 25-დან 50%-მდე გაზარდა, რის შესახებაც სოციალურ ქსელ Truth Social-ზე დაწერა. განახლებული ტარიფი მოქმედებაში ხვალ, 12 მარტს შევა.

"ასევე, კანადამ სასწრაფოდ უნდა დაწიოს ამერიკელი ფერმერებისთვის დაწესებული ანტიამერიკული, 250-დან 390%-მდე ტარიფები ამერიკულ რძის ნაწარმზე, რაც დიდი ხანია, აღმაშფოთებელია", — წერს ტრამპი.

ტრამპის მუქარისშემცველი პოსტის შემდეგ, X-ზე საპასუხო პოსტი გამოაქვეყნა ონტარიოს პროვინციის პრემიერმა დაგ ფორდმაც, რომლის გადაწყვეტილებითაც ნიუ-იორკის, მიჩიგანისა და მინესოტას შტატებს ელექტროენერგია გაუძვირდებათ — ფორდის თქმით, ის უკან არ დაიხევს, სანამ ამერიკული ტარიფები არ გაუქმდება და მზად არის, ელექტროენერგია საერთოდ გათიშოს.

"თუ აშშ სიტუაციის ესკალაციას გააგრძელებს, უყოყმანოდ გავთიშავ ელექტროენერგიას. დამიჯერეთ, არ მინდა ამის გაკეთება, თავს ძალიან ცუდად ვგრძნობ ამერიკელი ხალხის წინაშე, რადგან სავაჭრო ომი მათ არ დაუწყიათ. პასუხისმგებელი მხოლოდ ერთი პირია — ეს პრეზიდენტი ტრამპია", — განაცხადა დაგ ფორდმა.