ბათუმელების ცნობით, მოსამართლე ნინო სახელაშვილი, რომელმაც ბათუმელებისა და ნეტგაზეთის უკანონოდ დაკავებულ დამფუძნებელ მზია ამაღლობელს 2025 წლის 14 იანვრის სხდომაზე პატიმრობა შეუფარდა, უვადო მოსამართლედ გაამწესეს.

გამოცემის ინფორმაციით, სახელაშვილი ბათუმის საქალაქო სასამართლოში გამოსაცდელი, სამწლიანი ვადით 2022 წლის 10 მარტიდან გაამწესეს — ამ ვადის ამოწურვამდე მოსამართლე უვადოდ უნდა დანიშნონ, ან გაათავისუფლონ.

ბათუმელები საქალაქო სასამართლოდან ამ ფაქტის დასადასტურებლად იუსტიციის უმაღლეს საბჭოსთან გადაამისამართეს, ხოლო უმაღლესმა საბჭომ ჟურნალისტების ზარებსა და წერილებს პასუხი საერთოდ არ გასცა.

ნინო სახელაშვილის უვადოდ გამწესებას, გამოცემის ცნობით, ადასტურებს სასამართლო სხდომების ჩამონათვალი — მან 10 მარტს 6 პროცესი ჩაატარა, ხოლო შემდეგ სასამართლო სხდომას 19 მარტს ჩაატარებს.