3 მარტს ჰააგაში მომხდარ თავდასხმასთან დაკავშირებით, იუმორისტმა მიშა ანდღულაძემ პროკურატურას მიმართა. ის დაზარალებულად ცნობას და დაცვის დანიშვნას ითხოვს.

"ატვირთულ ვიდეოში ჩანს, რომ მე თურმე იმიტომ დამესხნენ თავს, რომ "ქართული ოცნების" მხარდამჭერებს ვუწოდე რუსები, რაც აბსოლუტური ტყუილია. ეს უკვე ჩემი სიცოცხლის საკითხს ეხება, მოვითხოვთ საჩივარში, რომ მე მცნონ დაზარალებულად და დამინიშნონ დაცვა, იმიტომ რომ მე არ მაქვს იმის საშუალება, რომ დაცვით ვიარო. გამოდის, რომ არამარტო საკუთარ ქვეყანაში, საზღვარგარეთაც არ ვარ დაცული.

მართლა გამოცხადებული სიკვდილის ქრონიკას ჰგავს, ყველა თითქოს მომართულია, რომ დამაკლდა მე, კიდე უფრო მეტი უნდა ყოფილიყო და რეალურად გამოვიდა, რომ კმაყოფილები არ დარჩნენ ადამიანები, ვისაც არ ვიცი, როგორი უნდოდა ვენახე. თითქოს რაღაც შემზადება მიდის, რომ უნდა მოხდეს, რაღაც ფატალური. სანამ ფატალური მოხდება იქამდე თუ არ ვუშველეთ, ეს ჯოჯოხეთია.

როგორც ჩანს, მეც აღმოვჩნდი, რაღაც ძალადობაში შეჯიბრის სტატისტიკაში. კომედიანტს, რომ ხუმრობის გამო თავს ესხმიან, რაღაზე უნდა ვილაპარაკოთ მაშინ. სხვას, რომელიც პირდაპირ ჩართულია რაღაც პროცესებში, იმას რა დაემართება წარმოდგენაც არ მაქვს," — თქვა მიშა ანდღულაძემ TV პირველთან საუბრისას.

ნიდერლანდებში ქალაქ ჰააგაში კომიკოს მიშა ანდღულაძეს 3 მარტს ქართველები თავს დაესხნენ. თავდასხმის ამსახველი ვიდეო სოციალურ ქსელში გავრცელდა. კადრებში ჩანს 10-მდე ადამიანი, რომლებიც ქუჩაში საუბრობენ. მოულოდნელად ერთ-ერთს, სავარაუდოდ, ანდღულაძე ურტყამენ.