ნიუ-იორკში 900-ზე მეტი საკონცერტო ბილეთის მოპარვის ბრალდებით ორი ადამიანი დააკავეს. ბილეთების უმეტესობა ტეილორ სვიფტის ერას ტურს ეკუთვნოდა. თაღლითებმა ამ გზით 600,000 დოლარზე მეტი გამოიმუშავეს.

ქუინსის ოლქის პროკურატურის ინფორმაციით, ტაირონ როუზი და შამარა პ. სიმონსი გასულ ხუთშაბათს დააკავეს და ბრალი წარუდგინეს დიდი ოდენობით ქურდობაში, კომპიუტერულ მანიპულაციაში, თაღლითობასა და გაყალბებაში. მათ ერას ტურის, ასევე ედ შირანისა და ადელის კონცერტების 993 ბილეთი მოიპარეს.

პროკურატურის ცნობით, როუზი და მისი თანამზრახველი მუშაობდნენ კომპანია Sunderland-ში, რომელიც StubHub-ის მესამე მხარის კონტრაქტორი იყო კინგსტონში, იამაიკაში. მათ StubHub-ის სისტემაში წვდომის საშუალებით, უკვე გაყიდული ბილეთების ბმულები მოიპარეს და გადაამისამართეს სიმონსსა და კიდევ ერთ თანამზრახველზე, რომელიც ამჟამად გარდაცვლილია. შემდეგ ბილეთები StubHub-ზე განათავსეს და კიდევ ერთხელ ძვირად გაყიდეს 2022 წლის ივნისიდან 2023 წლის ივლისამდე.

ქუინსის ოლქის პროკურორის, მელინდა კატცის განცხადებით: „ბრალდებულებმა ტეილორ სვიფტის პოპულარობა პირადი სარგებლისთვის გამოიყენეს. მათ, სავარაუდოდ, ბილეთების გაყიდვის სისტემაში არსებული ხარვეზით ისარგებლეს, მოიპარეს და გადაყიდეს დეკადის ყველაზე მასშტაბური ტურის ბილეთები, რის შედეგადაც 600,000 დოლარზე მეტი გამოიმუშავეს.“

ტეილორ სვიფტი

ტეილორ სვიფტი

ფოტო: Getty Images for TAS Rights Mana

StubHub-ის იურიდიული დეპარტამენტის ხელმძღვანელმა, მარკ სტრიმსმა, Variety-სთვის მიცემულ განცხადებაში აღნიშნა: „StubHub-ისთვის ჩვენი მომხმარებლების უსაფრთხოება უმაღლესი პრიორიტეტია. ამ კრიმინალური სქემის აღმოჩენისთანავე, დაუყოვნებლივ მივმართეთ ჩვენი მესამე მხარის მომსახურების კომპანიას, Sunderland Global Services (SGS)-ს, ქუინსის ოლქის პროკურატურასა და იამაიკის სამართალდამცავ ორგანოებს. გამოვავლინეთ ის SGS-ის თანამშრომლები, რომლებმაც სისტემის გაუმართავობით ისარგებლეს და სამსახურიდან გავათავისუფლეთ. StubHub-მა სრულად აუნაზღაურა თანხა დაზარალებულ მომხმარებლებს და გააძლიერა უსაფრთხოების ზომები. ვაფასებთ პროკურორ მელინდა კატცისა და სამართალდამცველების ძალისხმევას, რათა დამნაშავეები მართლმსაჯულების წინაშე წარსდგნენ.“

ტეილორ სვიფტი ერას ტურზე

ტეილორ სვიფტი ერას ტურზე

ფოტო: Skynews

ტეილორ სვიფტის ერას ტური ისტორიაში ყველაზე მასშტაბური პოპ-ტური გახდა და 2024 წლის დეკემბერში დასრულდა, რომლის საერთო შემოსავალმა 2 მილიარდ დოლარს გადააჭარბა. ტურის ბილეთის საწყისი ფასი საშუალოდ 204 დოლარი იყო, ხოლო გადამყიდველების ბაზარზე მისი ფასი 1,652 დოლარს აღწევდა.