ბრაზილიაში კარნავალის დროს ქუჩებში სუპერგმირების ხილვა უჩვეულო არ არის. ამ მასშტაბურ დღესასწაულზე, რომელსაც ხშირად „მსოფლიოს ყველაზე დიდ წვეულებას“ უწოდებენ, ბეტმენი, სუპერმენი და სპაიდერმენი სან-პაულუს ქუჩებში ხშირად ჩნდებიან.

მაგრამ წლევანდელ კარნავალზე, ფერად სამოსში გამოწყობილ უამრავ ადამიანს შორის, 1990-იანი წლების დროის პოლიციის რეინჯერების (Power Rangers) კოსტიუმში გამოწყობილმა ოთხმა ადამიანმა მიიქცია ყურადღება.

სან-პაულუს ხელისუფლების მიერ გავრცელებულ ვიდეოში ჩანს, თითქოს წითელი, ლურჯი, ყვითელი და მწვანე ყოვლისშემძლე რეინჯერები ტელეფონის ქურდს აკავებენ კარნავალის მონაწილეთა თვალწინ, რომლებიც სკანდირებენ: “Power Rangers! Power Rangers!”

ვიდეოს სხვა კადრში კი მეხუთე რეინჯერი – შავ ფორმაში – ქურდისთვის ჩამორთმეული ტელეფონებით სავსე მუშტს აღმართავს.

სან-პაულუს გუბერნატორმა ტარსიზიუ გომეს დე ფრეიტასმა სოციალურ ქსელ X-ზე გაამჟღავნა, რომ ეს რეინჯერები სინამდვილეში სამოქალაქო პოლიციის ოფიცრები არიან, რომლებიც კარნავალზე დანაშაულთან ბრძოლის ინოვაციურ მეთოდს იყენებენ.

გადაცმული პოლიციელები მანქანასთან

გადაცმული პოლიციელები მანქანასთან

ფოტო: სან-პაულუს პოლიცია

მისი თქმით, ამ დაკავების შედეგად პოლიციამ დამატებით კიდევ ოთხი მოპარული ტელეფონი და დაახლოებით 2,425 დოლარი ნაღდი ფული ამოიღო. „ჩვენი სამოქალაქო პოლიციის რეინჯერები კარნავალზე მორიგ შოუს შემოგვთავაზებენ!“ – დასძინა მან.

ბრაზილიის ყველაზე მჭიდროდ დასახლებული შტატი აცხადებს, რომ ქურდობისა და ძარცვის სპეციალიზებული ბანდები კარნავალის ხალხმრავლობით ხშირად სარგებლობენ. ხელისუფლება კი ფესტივალთან დაკავშირებულ დანაშაულებს ფარული პოლიციელებით ებრძვის.

„კარნავალისწინა შაბათ-კვირას მობილურის ქურდობის და ძარცვის 880 შემთხვევა დაფიქსირდა, რაც საგრძნობი კლებაა წინა წლის იმავე პერიოდის 2,344 შემთხვევასთან შედარებით“, – აღნიშნა სან-პაულუს ხელისუფლებამ.

ბრაზილიის კარნავალი წელს 5 მარტს დაიწყო.

იხილეთ ასევე: