რუსეთ-უკრაინის ომის საკითხებში აშშ-ის პრეზიდენტის სპეციალური წარმომადგენელი კიტ კელოგი კიევში ჩავიდა. ამის შესახებ Sky News წერს.

კელოგი დღეს ვოლოდიმირ ზელენსკის შეხვდება. ის ამბობს, რომ კარგია კვლავ კიევში დაბრუნება

"მე ვაპირებ საუბარს პრეზიდენტ ზელენსკისთან", — დასძინა მან.

კითხვაზე, რა არის მისი მესიჯი, მან თქვა: "ჩვენ მას მოვუსმენთ".

"გვესმის უსაფრთხოების გარანტიების საჭიროება. ჩემი მისიის ნაწილია მოსმენა. შემდეგ დავბრუნდები შეერთებულ შტატებში, დაველაპარაკები პრეზიდენტ ტრამპს, რათა დავრწმუნდეთ, რომ ყველაფერი სწორად გავიგეთ", – განაცხადა კელოგმა.

გუშინ ერ-რიადიში უკრაინაში მიმდინარე ომის დასრულებაზე აშშ-ს და რუსეთის მაღალჩინოსნებმა იმსჯელეს. მოლაპარაკებაზე მიწვეული არ იყო უკრაინის პრეზიდენტი ვლადიმერ ზელენსკი. მისი თქმით, მიწვევის შემთხვევაშიც კი არ ჩავიდოდა შეხვედრაზე, რადგან უკრაინა არ მონაწილეობდა მის მომზადებაში. ზელენსკიმ აღნიშნა, რომ უკრაინა არ მიიღებს შეერთებულ შტატებსა და რუსეთს შორის მისი ქვეყნის ბედთან დაკავშირებით მიღწეულ რაიმე შეთანხმებებს, რომლებიც უკრაინელების მონაწილეობის გარეშე იქნება მიღებული.

აშშ-ს სახელმწიფო დეპარტამენტის განცხადების მიხედვით, მხარეები შემდეგ საკითხებზე შეთანხმდნენ:

"ჩამოყალიბდეს საკონსულტაციო მექანიზმი, რათა მოგვარდეს ორმხრივ ურთიერთობაში გამაღიზიანებელი ფაქტორები იმ მიზნით, რომ შესაბამისი დიპლომატიური მისიების საქმიანობის ნორმალიზებისთვის საჭირო ნაბიჯები გადაიდგას ;

შეიქმნას მაღალი დონის ჯგუფები, რათა რაც შეიძლება სწრაფად დაიწყოს მუშაობა უკრაინაში კონფლიქტის დამთავრებაზე ისე, რომ ეს იყოს მდგრადი, გრძელვადიანი და მისაღები ყველა მხარისთვის;

საფუძველი ჩაეყაროს სამომავლო თანამშრომლობას საერთო გეოპოლიტიკური ინტერესის მქონე საკითხებზე, ასევე ისტორიულ, ეკონომიკურ და საინვესტიციო შესაძლებლობებზე, რაც უკრაინაში კონფლიქტის წარმატებით დასრულების შედეგად აღმოცენდება;

მხარეებმა შეხვედრაზე პირობა დადეს, შეინარჩუნონ ერთმანეთთან წვდომა, რათა გარანტირებული იყოს, რომ პროცესი წინ დროულად და პროდუქტიულად წავიდეს".