აშშ-ის პრეზიდენტი დონალდ ტრამპი უკრაინის პრეზიდენტს, ვოლოდიმირ ზელენსკის ესაუბრა მას შემდეგ, რაც რამდენიმე საათით ადრე რუსეთის ფედერაციის პრეზიდენტთან, ვლადიმერ პუტინთან საათ-ნახევრიანი საუბარი გამართა.

"ახლახან ვესაუბრე უკრაინის პრეზიდენტს, ზელენსკის. საუბარი ძალიან კარგად წარიმართა. მას, ისევე, როგორც პრეზიდენტ პუტინს, სურს მშვიდობის დამყარება. ჩვენ განვიხილეთ სხვადასხვა საკითხი, რომლებიც უკავშირდება ომს, მაგრამ ძირითადად ვისაუბრეთ შეხვედრაზე, რომელიც დაგეგმილია პარასკევს მიუნხენში, სადაც დელეგაციას უხელმძღვანელებენ ვიცე-პრეზიდენტი ჯეი დი ვენსი და სახელმწიფო მდივანი მარკო რუბიო. იმედი მაქვს, ამ შეხვედრის შედეგები პოზიტიური იქნება. დროა, შეწყდეს ეს აბსურდული ომი, რომელმაც გამოიწვია მასობრივი და სრულიად არასაჭირო მსხვერპლი და ნგრევა. ღმერთმა დალოცოს რუსი და უკრაინელი ხალხი", — წერს ტრამპი სოციალურ ქსელში.

ტრამპთან სატელეფონო საუბარზე წერს უკრაინის პრეზიდენტი ვოლოდიმირ ზელენსკიც — ის აღნიშნავს, რომ ლიდერებმა უსაფრთხოების, ეკონომიკური თანამშრომლობისა და რესურსების კუთხით პარტნიორობის შესახებ ახალი დოკუმენტის მომზადების შესაძლებლობები განიხილეს

"ტრამპმა პუტინთან საუბრის დეტალები გამიზიარა. არავის სურს მშვიდობა უკრაინაზე მეტად. ჩვენ ვგეგმავთ შემდგომ ნაბიჯებს რუსული აგრესიის შესაჩერებლად და მყარი, საიმედო მშვიდობის უზრუნველსაყოფად. როგორც პრეზიდენტმა ტრამპმა თქვა, მოდით, გავაკეთოთ ეს. ჩვენ შევთანხმდით, რომ შევინარჩუნებთ შემდგომ კონტაქტს და დავგეგმავთ მომავალ შეხვედრებს", — წერს ზელენსკი X-ზე.