ბაქო-თბილისი-ბაქოს მატარებელი ექსპლუატაციაში აპრილიდან შევა, ამის შესახებ ინფორმაციას აზერბაიჯანული მედია ავრცელებს.

1news.az წერს, რომ აღნიშნულთან დაკავშირებით აზერბაიჯანისა და საქართველოს შესაბამის ორგანოებს შორის შეთანხმება მიღწეულია. გავრცელებული ინფორმაციით, ბაქო-თბილისი-ბაქოს მატარებელი მუშაობას აპრილიდან განაახლებს. მგზავრთა გადაყვანა შვეიცარიული "შტადლერის" მატარებლებით განხორციელდება.

1news.az-სთან აზერბაიჯანის რკინიგზის საზოგადოებასთან ურთიერთობის დეპარტამენტი აცხადებს რომ საერთაშორისო სამგზავრო გადაზიდვები ამჟამად აზერბაიჯანის სახმელეთო საზღვრების ჩაკეტვის გამოა შეჩერებული.

"მოგეხსენებათ, მინისტრთა კაბინეტის გადაწყვეტილებით, აზერბაიჯანში გრძელდება სპეციალური საკარანტინო რეჟიმი და ჩაკეტილია ქვეყნის სახმელეთო საზღვრები. ამის გამო მატარებლებით საერთაშორისო სამგზავრო გადაყვანა არ ხორციელდება", — აცხადებენ დეპარტამენტში.

ასევე ნათქვამია, რომ შესაბამისი შეთანხმების მიღწევის შემთხვევაში, აზერბაიჯანის რკინიგზამ შეიძლება დაიწყოს მოსამზადებელი სამუშაოები ამ მიმართულებით მგზავრთა ტრანსპორტირების აღსადგენად.