პრობლემური რეპუტაციის მქონე ამერიკელმა რეპერმა, ქანიე უესთმა, ინტერნეტმომხმარებლების აღშფოთება კიდევ ერთხელ გამოიწვია. უესთმა, რომელსაც უკვე მხოლოდ Ye-დ მოიხსენიებენ, მაისურები გამოუშვა სვასტიკის გამოსახულებით. ნაცისტური სიმბოლიკით ბრენდირებული მაისური $20 ღირს და უესთის დაფუძნებული ბრენდის, Yeezy-ის, ვებგვერდზე იყიდება.

აღსანიშნავია, რომ Yeezy-ის ახალი სატელევიზიო რეკლამა ამერიკის ეროვნული საფეხბურთო ლიგის ჩემპიონატის, "სუპერ-ბოულის", ფინალის დროს გაეშვა.

უესთი კი, რომელმაც ბოლო დღეებში ანტისემიტური, ჰომოფობიური და მიზოგინიური განცხადებები გააკეთა, კიდევ ერთხელ გახდა მწვავე კრიტიკის ობიექტი. X-ზე (ყოფილ ტვიტერზე) მის მიერ გამოქვეყნებულ პოსტებს არაერთი ცნობილი ადამიანი და ორგანიზაცია გამოეხმაურა და პლატფორმის მფლობელს, ბიზნესმენ ილონ მასკს, მოქმედებისკენ მოუწოდა; მათ შორის არიან მსახიობი დევიდ შვიმერი და ანტისემიტიზმთან მებრძოლი ორგანიზაცია Anti-Defamation League.

უესთის ანგარიში X-ზე არაერთგზის დაბლოკილა, მათ შორის, მასკის ხელმძღვანელობის პერიოდში, 2022 წელს, როცა ბიზნესმენმა რეპერი "ძალადობის წახალისებაში" დაადანაშაულა. 2023 წელს ქანიეს ანგარიში აღდგა, მაგრამ ახლახან მან თავადვე გადაწყვიტა პროფილის დეაქტივაცია და მასკს მადლობაც გადაუხადა.

საკამათო განცხადებების გამო, უესთთან თანამშრომლობა წინათ ისეთმა ბრენდებმა შეწყვიტეს, როგორებიც არიან Adidas და Gap. 2022 წელს უესთთან დაახლოებულმა პირებმა CNN-თან ინტერვიუში აღნიშნეს, რომ ნაცისტური გერმანიის ლიდერი Ye-ის აღფრთოვანებას დიდი ხანია, იწვევს და რეპერი ადოლფ ჰიტლერის სახელობის ალბომის გამოშვებასაც აპირებდა.