საქართველოს ეკონომიკის მინისტრის მოადგილე, ნინო ჯავახაძე მიიჩნევს, რომ ბოლო რამდენიმე დღის განმავლობაში ლარის გაუფასურებაში საგანგაშო არაფერია. მინისტრის მოადგილე ამბობს, რომ მიზეზი მცურავი კურსია, რომელზეც გავლენას მოლოდინები ახდენს.

"მოსახლეობას გვინდა, ვურჩიოთ, რომ ნუ აჰყვებიან ამ რაღაც უარყოფით მოლოდინებს, კურსი არის ბაზრის მოთხოვნა და მიწოდება განსაზღვრავს კურსს - ის ხან გაიზრდება, ხან შემცირდება, არაფერი ამ ეტაპზე საგანგაშო არ არის," - განაცხადა საქართველოს ეკონომიკისა და მდგრადი განვითარების მინისტრის მოადგილემ, ნინო ჯავახაძემ.

დღეს, 5 სექტემბერს On.ge-მ თბილისში სავალუტო პუნქტებში არსებულ კურსზე მასალა მოამზადა. დღეს ერთი ევროს შეძენა 2,98 ლარადაა შესაძლებელი, ერთი აშშ დოლარი კი - 2,51 ლარი ღირს.

ლარის კურსი უფრო დაბალია საქართველოს კომერციულ ბანკებში. დღის განმავლობაში ორ უმსხვილეს ბანკში - საქართველოს ბანკსა და თიბისი ბანკში დოლარის ყიდვა ერთნაირი კურსით - 2,535 ლარად იყო შესაძლებელი. საქართველოს ბანკში ერთი ევრო 3,015 ლარი ღირდა, თიბისი ბანკში - 3,024 ლარი.