"სოლიდარობა და გვერდში დგომა მინდა გამოვხატო თითოეული მოშიმშილე პატიმრის მიმართ", — ამის შესახებ ანდრო ჭიჭინაძის მიერ ციხიდან გამოგზავნილ წერილში ვკითხულობთ. ის მხარდაჭერას უცხადებს ლაშა ჩხვიმიანს და მზია ამაღლობელს და წერს, რომ ყველას მათი ჯანმრთელობა და მხნეობა გვჭირდება.

"სოლიდარობა და გვერდში დგომა მინდა გამოვხატო თითოეული მოშიმშილე პატიმრის მიმართ და არამარტო პატიმრის, ასევე, ლაშა ჩხვიმიანის მიმართ, რომელიც არის მაგალითი ღირსების და ადამიანობის მთელი მისი ბიოგრაფიით, ჯანმრთელობას და მხნეობას ვუსურვებ თითოეულ მათგანს.

აუცილებლად ცალკე უნდა ვახსენო მზია ამაღლობელი, რომელიც სამაგალითოდ იბრძოდა სიმართლით ყველა რეჟიმის წინააღმდეგ. მზიას პროფესიონალიზმი და მებრძოლი ხასიათი არის მისი პატიმრობის მიზეზი.

ჩვენ ყველას გვჭირდება თქვენი ჯანმრთელობა და მხნედ ყოფნა!" — ანდროს ჭიჭინაძის წერილს მისი ადვოკატი, თორნიკე მიგინეიშვილი, ფეისბუქ-გვერდზე აქვეყნებს.

5 დეკემბერს, მსახიობი ანდრო ჭიჭინაძე საპროტესტო აქციაზე ჯგუფური ძალადობის მუხლით დააკავეს და წინასწარ პატიმრობაში იმყოფება. სასჯელის სახით მას 4-6 წლამდე თავისუფლების აღკვეთა ემუქრება.

წინასწარ პატიმრობაში იმყოფება ნეტგაზეთისა და ბათუმელების დამფუძნებელი და დირექტორი მზია ამაღლობელი, რომელიც 24-ე დღეა შიმშილობს. ამაღლობელს, პოლიციელის თავდასხმის ბრალდებით, 4-7 წლამდე თავისუფლების აღკვეთა ემუქრება. მზია ამაღლობელის სოლიდარობის ნიშნად დმანისის თეატრის ყოფილი ხელმძღვანელი, ლაშა ჩხვიმიანი, დმანისში მერიის წინ, მე-6 დღეა შიმშილობს.