ევროკავშირის ელჩი, პაველ ჰერჩინსკი პროევროპული საპროტესტო აქციების დროს დაკავებულების ოჯახის წევრებსა და მეგობრებს შეხვდა.

როგორც შეხვედრის შემდეგ პატიმრების ოჯახის წევრები აცხადებდნენ, ელჩისგან საკმაოდ მკაცრი შეფასებები მოისმინეს.

"[ევროკავშირის ელჩს] არ მორიდებია ზუსტი სახელები ეწოდებინა იმ ადამიანებისა და მოვლენებისათვის, რაც ქვეყანაში ვითარდება — იყვნენ მწამებლები, იყო არაპროპორციული ძალა გამოყენებული, იყო ცემა, დაშინებაა… ევროკავშირის ყველა ქვეყანა მაქსიმუმს აკეთებს და გააგრძელებს მუშაობას იმისათვის, რომ მთავარი მიზანი მიღწეული იქნას, რაც არის პოლიტპატიმრების გათავისუფლება და ახალი არჩევნების ჩატარება" — განაცხადა ზურაბ ცეცხლაძემ, ზვიად ცეცხლაძის მამამ.

კიდევ ერთი პატიმრის, საბა სხვიტარიძის დედამ, ლელა ახობაძემ განაცხადა, რომ ელჩთან შეხვედრისას სანქციების უფრო გამკაცრებაზეც იყო საუბარი.

"იყო მკაცრი შეფასებები. დაგვპირდნენ, რომ უფრო მკაცრ სანქციებს მიიღებენ და უფრო მკაცრად გადახედავენ… გაოცებულები იყვნენ თითოეული საქმის მოსმენისას. ზედმეტად გაკვირვებულები იყვნენ. სიმართლე რომ ვთქვა, მაგათმა უფრო უწოდეს მწამებლები ამათ", — განაცხადა საბა სხვიტარიძის დედამ.

ანდრო ჭიჭინაძის დედამ აღნიშნა, რომ ელჩისგან ვითარების ადეკვატური შეფასება მოისმინა.

"ყველამ მოვყევით ჩვენი ამბავი, ძალიან კარგად მოგვისმინა [ელჩმა] და ღია ტექსტით ითქვა, რომ ეს ე.წ. ხელისუფლება გამოსულია წყობიდან", — განაცხადა ლიკა გუნცაძემ, ანდრო ჭიჭინაძის დედამ.

შეხვედრის შემდეგ განცხადება გაავრცელა ევროკავშირის წარმომადგენლობამაც, სადაც ნათქვამია, რომ სრულ სოლიდარობას უცხადებენ ყველა უსამართლოდ დაკავებულს და "ქართული ოცნების" ხელისუფლებას მათი გათავისუფლებისკენ მოუწოდებს.

"დღეს ევროკავშირის ელჩი, თავის გუნდთან ერთად, საქართველოში მიმდინარე საპროტესტო აქციების კონტექსტში დაკავებულების ოჯახებს და მეგობრებს შეხვდა.
ყოველი დაკავებულის უკან ოჯახები და მეგობრები დგანან, რომლებიც ასევე უზარმაზარ სირთულეებს განიცდიან.
ჩვენი საერთო დემოკრატიული ღირებულებების დაცვის გამო არავინ არ უნდა ისჯებოდეს. ევროკავშირი სრულ სოლიდარობას უცხადებს ყველა უსამართლოდ დაკავებულს და მათი გათავისუფლებისკენ მოუწოდებს. სამართლიანობამ უნდა გაიმარჯვოს. დაუსჯელობა უნდა დასრულდეს", — ნათქვამია ევროკავშირის წარმომადგენლობის განცხადებაში.