პროევროპული აქციების ერთ-ერთი მონაწილე საბა ჯიქია თბილისის საქალაქო სასამართლოს მოსამართლე ლელა კალიჩენკომ პატიმრობაში დატოვა. მას გამოძიება შინაგან საქმეთა სამინისტროს განსაკუთრებულ დავალებათა დეპარტამენტის (გდდ) თანამშრომლისთვის წიხლის ჩარტყმას ედავება.

მოსამართლე კალიჩენკო დაეთანხმა პროკურორ თამარ იაკობიძის დასაბუთებას, რომ არსებობს ბრალდებულის მიმალვის, მტკიცებულებებზე ზემოქმედებისა და განმეორებითი დანაშაულის ჩადენის საფრთხე.

საბა ჯიქიას ადვოკატმა ბრალდებულის გათავისუფლება მოითხოვა და ალტერნატივის სახით სასამართლოს გირაოც შესთავაზა. პოზიციის დასაბუთებისას მან აღნიშნა, რომ პატიმრობა დაუსაბუთებელია.

"ყველა გამოკითხული ან გამომძიებელია, ან ექსპერტი, სხვა ნეიტრალური მოწმე საქმეში არ არსებობს. საბა ჯიქიას არ აქვს შესაძლებლობა იმისა, რომ ზეგავლენა მოახდინოს მოწმეებზე. სულ პატიმრობაში ხომ არ იქნება?!
მიმაჩნია, რომ არ არის საფრთხე იმ დოზით, რომ ყველაზე მკაცრი აღკვეთის ღონისძიება იყოს გამოყენებული", — თქვა ადვოკატმა.

საბა ჯიქია თავს დამნაშავედ არ ცნობს. შესაბამისად, საპროცესო შეთანხმებაზე მოლაპარაკება არ მიმდინარეობს.

მოსამართლე ლელა კალიჩენკომ 18 წლის საბა ჯიქიას პატიმრობაში დატოვების გადაწყვეტილება ახსნა დანაშაულის სიმძიმის დასაბუთებით და ახსენა დანა, რომელიც, სავარაუდოდ, ბრალდებულს ხელში ეკავა, იმის მიუხედავად, რომ სიტყვა "დანა" არც ერთ მხარეს არ უხსენებია.

18 წლის სტუდენტი საბა ჯიქია პოლიციელზე თავდასხმის ბრალდებით 2024 წლის 5 დეკემბერს დააკავეს. პროკურატურა მას 2024 წლის 30 ნოემბერს რუსთაველის გამზირზე მიმდინარე საპროტესტო აქციაზე პოლიციელისთვის ფეხის ჩარტყმას ედავება. ჯიქია წარდგენილ ბრალს არ აღიარებს.

ბრალის დამტკიცების შემთხვევაში მას 7 წლამდე ვადით თავისუფლების აღკვეთა ემუქრება.