ევროსაბჭოს საპარლამენტო ასამბლეის პრეზიდენტი [მზია ამაღლობელისთვის] ყველაფერს გააკეთებს დღესვე რაც მის შესაძლებლობებშია, — ამის შესახებ "კოალიცია ცვლილებისთვის" წევრი ზურაბ ჯაფარიძე სოციალურ ქსელში წერს.

"კოალიცია ცვლილებისთვის" წევრი ზურაბ ჯაფარიძე, "ერთიანობა ნაციონალური მოძრაობის" წევრი ზურაბ ჭიაბერაშვილი, კოალიცია "ძლიერი საქართველოს" წევრი სალომე სამადაშვილი და "სტრატეგია აღმაშენებელის" ლიდერი გიორგი ვაშაძე ევროსაბჭოს საპარლამენტო ასამბლეის პრეზიდენტს შეხვდნენ. შეხვედრის ამსახველ ფოტოს ზურაბ ჯაფარიძე სოციალურ ქსელში ავრცელებს.

მისი თქმით, ევროსაბჭოს საპარლამენტო ასამბლეის პრეზიდენტს "ბათუმელებისა" და "ნეტგაზეთის" დამფუძნებლის, მზია ამაღლობელის საქმესთან სასაუბროდ შეხვდნენ.

"სპეციალურად შევხვდით მზია ამაღლობელზე სალაპარაკოდ. დეტალებით დაინტერესდა. დაგვპირდა, რომ ყველაფერს გააკეთებს დღესვე, რაც მის შესაძლებლობებშია",— წერს ზურაბ ჯაფარიძე.

ბათუმის საქალაქო სასამართლომ "ბათუმელებისა" და "ნეტგაზეთის" დამფუძნებელს, მზია ამაღლობელს აღკვეთის ღონისძიების სახით პატიმრობა შეუფარდა. მზია ამაღლობელმა ბათუმის პოლიციის უფროსს, ირაკლი დგებუაძეს სახეში სილა გააწნა. ამაღლობელს ბრალი სისხლის სამართლის კოდექსის 353-ე პრიმა მუხლით წაუყენეს, რაც პოლიციელზე თავდასხმას გულისხმობს. მზია ამაღლობელი დაკავების დღიდან შიმშილობს. დღეს მისი შიმშილობის მე-18 დღეა.