კოალიცია ძლიერი საქართველოს ერთ-ერთი ლიდერი და საკრებულოს წევრი, საბა ბუაძე სოციალურ ქსელში წერს, რომ კახა კალაძეს მერიის საქალაქო სამსახურებში რეორგანიზაციის დაწყება სურს.

საბა ბუაძე აღნიშნულ პოსტთან ერთად დოკუმენტებს აქვეყნებს, საიდანაც ირკვევა, რომ კახა კალაძემ ქონების მართვის სააგენტოში, არქიტექტურის სამსახურსა და ტრანსპორტის და ურბანული განვითარების სააგენტოს რეორგანიზაციის დასაწყებად ბრძანება 2024 წლის 31 დეკემბერს გამოსცა.

"სამოქალაქო პროტესტში მონაწილე საჯარო მოხელეების წინააღმდეგ ანგარიშსწორება ახალ ეტაპზე გადადის - კალაძის დაანონსებული რეორგანიზაციის გადაწყვეტილება ხვალ თბილისის საკრებულოში გამოდის თანხმობის მისაღებად.
ეს რეორგანიზაცია არის პოლიტიკური წმენდა, რომლის მიზანია თავისუფალი ადამიანების წინააღმდეგ რევანში და ადგილობრივი არჩევნებისთვის მომზადება იმ ჯგუფის მიერ, რომელმაც გაყალბების ფონზეც კი წააგო თბილისი.
ეს რეორგანიზაცია პოლიტიკური წმენდა რომ არის იმითაც დასტურდება, რომ არანაირი დასაბუთება და არგუმენტი თან არ ახლავს, მხოლოდ ერთი ფრაზა - „სისტემური და ეფექტიანი მმართველობის უზრუნველყოფის მიზნით“.
მიუხედავად იმისა, რომ სასამართლოს მიმართ არანაირი მოლოდინი არ მაქვს, ამ უკანონობას მაინც გავასაჩივრებ სასამართლოში. ვიყავი, ვარ და ვიქნები იმ საჯარო მოხელეების გვერდით რომელთა თავისუფლებაზეც გადის რეჟიმის მიმართ წინააღმდეგობა.
თავისუფლება რეჟიმის პატიმრებს და სოლიდარობა ღირსეულ საჯარო მოხელეებს!" — წერს საბა ბუაძე