სამოქალაქო საზოგადოებას უკან დასახევი გზა აღარ აქვს, "ოცნების" რეჟიმი საზოგადოების ყველა სეგმენტსა და გამორჩეულ ფიგურებს ესხმის თავს, მათ შორის მზია ამაღლობელს, რომლის საქმეს სერიოზულობას და განსაკუთრებულობას ისიც სძენს, რომ იგი რეგიონულ მედიას წარმოადგენს. ამის შესახებ სალომე ზურაბიშვილმა მაკკეინის ინსტიტუტში ისაუბრა, სადაც იგი ჟურნალისტებს შეხვდა. ინფორმაციას "ნეტგაზეთი" ავრცელებს.

ჟურნალისტ ნანა საჯაიას კითხვაზე, იმ პირობებში, როცა "ოცნების" ხელისუფლება ადგილობრივი და საერთაშორისო საზოგადოების წნეხის მიუხედავად, არ თმობს პოზიციებს, მზია ამაღლობელი კი უკვე 11 დღეა შიმშილობს, რა შეიძლება გაკეთდეს აშშ-ის მხრიდან და ჰქონდა თუ არა სალომე ზურაბიშვილს აშშ-ში მისი ვიზიტის მიმდინარეობისას ამ თემაზე საუბარი, სალომე ზურაბიშვილმა უპასუხა, რომ იმ ტიპის შეხვედრებზე, რაც მას ამერიკაში ვიზიტის ფარგლებში ჰქონდა, აქამდე არ ჰქონია შესაძლებლობა, მზია ამაღლობელზე ესაუბრა, თუმცა დარწმუნებულია, რომ ამის შესაძლებლობა მომდევნო შეხვედრებზე ექნება.

"ვფიქრობ, რომ ჟურნალისტთა უფლებადამცველი ორგანიზაციები აქტიურად უნდა ჩაერთონ. მზია ამაღლობელის საქმე ძალიან მნიშვნელოვანია, არამარტო იმიტომ, რომ ის იდევნება, როგორც ჟურნალისტი, არამედ იმიტომაც, რომ ის რეგიონულ მედიას წარმოადგენს. რეგიონული მედია კი ისედაც რთულ მდგომარეობაშია. ეს მედიები არსებითი მნიშვნელობისაა ქართული დემოკრატიის მომავლისთვის.", — განაცხადა სალომე ზურაბიშვილმა.

საქართველოს მეხუთე პრეზიდენტი მიიჩნევს, რომ ამერიკული ორგანიზაციები უნდა კონცენტრირდნენ რეგიონულ მედიაზე, რეგიონულ ტელევიზიაზე, პრესაზე, რადგან სწორედ რეგიონებშია მეტი პრობლემა ინფორმაციაზე წვდომის თვალსაზრისით, რადგან იქ უფრო ძლიერია სამთავრობო პროპაგანდა. ზურაბიშვილი მიიჩნევს, რომ მზია ამაღლობელის საქმე ძალიან სერიოზული საქმეა და სისტემის პოლიტიკას გამოხატავს.

"ერთ მხარეს არიან მსახიობები, ცნობილები, პოპულარულები, ეს ხალხი პოლიტაქტივისტები არ ყოფილან, არ არსებობს არანაირი საფუძველი, რომ ისინი 9 წლამდე გამოკეტო ციხეში. აქეთ არის ჟურნალისტი, ცდილობენ რეპრესიებში მოაქციონ ყველა, პოლიტიკოსებიც, ყოფილი პრემიერ-მინისტრიც, მათ შორის და ა.შ. მიზანში იღებენ გამორჩეულ ფიგურებს, რომ ყველა მიხვდეს, რეჟიმი ყველასთან მივა. ამასთან, აჩვენებენ სამოქალაქო საზოგადოებას, რომ გზა უკან არ არსებობს. კედელთან დგახარ, არ არსებობს უკან დასახევი გზა, რომც გინდოდეს, რომც დაიღალო და გაჩერება მოგინდეს, ამის შესაძლებლობა უბრალოდ აღარ არსებობს“, — თქვა სალომე ზურაბიშვილმა ჟურნალისტის პასუხად.

„ნეტგაზეთისა“ და „ბათუმელების“ თანადამფუძნებელი და დირექტორი, მზია ამაღლობელი 11-12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა "იფიცება საქართველო", მეორედ — ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს. ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა. 14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. სააპელაციო სასამართლომ კი არც კი განიხილა სარჩელი, რომლითაც მზია ამაღლობელისთვის პატიმრობის შეფარდება გასაჩივრდა.

მზია ამაღლობელი დაკავების დღიდან, 12 იანვრიდან შიმშილობს.