თბილისის საქალაქო სასამართლოში, 18 იანვარს თემქაზე გამართულ საპროტესტო აქციაზე დაკავებული რეჟისორი, გურამ მაცხონაშვილი თბილისის საქალაქო სასამართლოს მოსამართლემ, ლელა ცაგარეიშვილმა სამართალდამრღვევად ცნო და 2000 ლარით დააჯარიმა.

გურამ მაცხონაშვილს ადმინისტრაციულ სამართალდარღვევათა კოდექსის 173-ე (პოლიციელის მოთხოვნისადმი დაუმორჩილებლობას) და 174/1 (შეკრების ან მანიფესტაციის ორგანიზებისა და ჩატარების წესის დარღვევა) მუხლების დარღვევას ედავებოდნენ.

სასამართლო პროცესზე დაკავებულმა თქვა, რომ არ შეეძლო აქციაზე ნიღბის მოხნა, რადგან მისი იქ ყოფნის საფუძველი სწორედ ეს იყო.

"შინაგან საქმეთა სამინისტროს წარმომადგენელი ჩემთვის არის არალეგიტიმური წარმომადგენელი, იმიტომ, რომ არ ვაღიარებ ამ პარლამენტს, შესაბამისად, არ ვაღიარებ ამ პარლამენტის მიერ დანიშნულ მინისტრებს.

მე არ შემეძლო ნიღბის მოხსნა, იქიდან გამომდინარე, რომ ჩემი იქ ყოფნის საფუძველი სწორედ ეს იყო. თუ გავყვებით პოლიციელების ქცევის ლოგიკას, მათი თხოვნა იყო, რომ მომეხსნა, რომ ვყოფილიყავი იდენტიფიცირებად, რამდენჯერმე მოვიხსენი, სახელი და გვარიც ვუთხარი. ამან შეიძინა სიმბოლური მნიშვნელობა, როცა ამისი დრო და ადგილი იყო, პოლიციის განყოფილებასთან, განზრახ გავიკეთე თავსახვევი.

...ზუსტად იმავეს გავაკეთებდი ანალოგიურ სიტუაციაში, იმიტომ, რომ მნიშვნელოვანია თანმიმდევრულობა ჩვენი მხრიდან", — გურამ მაცხონაშვილის კომენტარს პუბლიკა ავრცელებს.

ცნობისათვის, 18 იანვარს გურამ მაცხონაშვილთან ერთად კიდევ 5 პირი დააკავეს ადმინისტრაციული წესით: კამპანია ამომრჩევლების წევრები — მარიამ პაიჭაძე და სონა კალანდაძე და აქტივისტები თამარა ჩუმაშვილი, რომან აკოპოვი და მარიამ გილაშვილი.

გუშინ, 19 იანვარს, თემქის პოლიციასთან საპროტესტო აქციაზე დაკავებული 6 პირიდან 4 — მარიამ პაიჭაძე, სონა კალანდაძე, თამარა ჩუმაშვილი და მარიამ გილაშვილი გაათავისუფლეს. 2 მათგანი კი — გურამ მაცხონაშვილს და რომან აკოპოვი წინასწარი დაკავების იზოლატორში დატოვეს.